२५

देव सूर्य सोमं क्रेष्यामस्तं ते प्रब्रूमस्तं त्वं विश्वेभ्यो देवेभ्यः क्रतून्कल्पय दक्षिणाः कल्पय यथर्तु यथादेवतमित्यादित्यमुपस्थाय सोमविक्रयिणे राजानं प्रदाय पणते १

सोमविक्रयिन्क्रय्यस्ते सोमा इति २

क्रय्य इतीतरः प्रत्याह ३

सोमं ते क्रीणाम्यूर्जस्वन्तं पयस्वन्तमित्युक्त्वा कलया ते क्रीणानीत्येनमाह ४

भूयो वा अतः सोमो राजार्हतीति सरवेषु पणनेषु सोमविक्रयी प्रत्याहासम्पदः ५

कुष्ठया ते क्रीणानीति द्वितीयम् । शफेन ते क्रीणानीति तृतीयम् । पदा ते क्रीणानीति चतुर्थम् ६

एवं त्रिः ७

एकैकशो वा त्रिस्त्रिः ८

गवा ते क्रीणानीत्यन्ततः ९

अपि वा न गवेति ब्रूयात् । एषेति निर्दिश्य जपति तस्या आत्मा तस्या रूपं तस्याः प्रजा तस्याः पयस्तस्या बन्धुरिति १०

शुक्रं ते शुक्रेण क्रीणामीति जपित्वा हिरण्येन क्रीणाति ११

तपसस्तनूरसीति जपित्वाजया क्रीणाति १२

अवशिष्टानामेकैकेन १३

यदृषभेण क्रीणीयात्प्रजापतिना क्रीणीयात् । तत्स्थाने वत्सतरः साण्डः १४

मिथुनाभ्यामिति वत्सतरो वत्सतरी च १५

ताभ्यां युगपत्क्रीत्वा वाससान्ततः सम्पादयति १६