२४

अत्रादित्योपस्थानं राज्ञश्च निवपनादि कर्मैके समामनन्ति १

अपि पन्थामगस्महीत्युद्धृतपूर्वफलकेनानसा परिश्रितेन छदिष्मता प्राञ्चः सोममच्छ यान्ति २

शीर्ष्णा गिरौ क्रीतं हरन्ति ३

अपरेणोत्तरेण वा राजानं प्रागीषमुदगीषं वा नद्धयुगं शकटं चुबुकप्रतिष्ठितम् ४

अंशुना ते अंशुः पृच्यतामिति यजमानो राजानमभिमन्त्रयते ५

यं कामयेतापशुः स्यादित्यृक्षतस्तस्येत्युक्तम् ६

क्षौमं वासो द्विगुणं त्रिगुणं वा प्राग्दशमुत्तरदशं चर्मण्यास्तृणाति । उदग्दशं वा ७

तस्मिन्हिरण्यपाणिरङ्गुष्ठेन कनिष्ठिकया चाङ्गुल्यांशून्सङ्गृह्यान्यचन्नभि त्यं देवं सवितारमित्यतिच्छन्दसर्चा मिमीते ८

एवमेकयैकयोत्सर्गम् ९

सर्वास्वङ्गुष्ठमुपनिगृह्णाति १०

यया प्रथमं न तया पञ्चमं तयैवोत्तमम् ११

पञ्चकृत्वो य्जुषा मिमीते । पञ्चकृत्वस्तूष्णीम् १२

एवं द्विस्त्रिरपरिमितकृत्वो वा १३

प्रजाभ्यस्त्वेत्यवशिष्टानंशूनुपसमूह्य क्षौमेण वाससोपसङ्गृह्य प्राणाय त्वेति द्विगुणेनोष्णीषेणोपनह्य व्यानाय त्वेति विस्रस्यावेक्षते प्रजास्त्वमनुप्राणिहि प्रजास्त्वामनुप्राणन्त्विति १४

एष ते गायत्रो भाग इत्येतैर्यजमानो राजानमुपतिष्ठते १५