१८

अग्ने त्वं सु जागृहीति स्वप्स्यन्नाहवनीयमभिमन्त्रयते १

त्वमग्ने व्रतपा असीति प्रबुध्य मुष्टी वाचं वा विसृज्यादीक्षितवादं वोदित्वा २

विश्वे देवा अभि मामाववृत्रन्निति प्रबुध्य जपति । पुनर्मनः पुनरायुरागात्पुनः प्राणः पुनराकूतमागात् । वैश्वानरोऽदब्धस्तनूपा अवबाधतां दुरितानि विश्वेति च ३

तस्माद्दीक्षितो द्वादशाहं भृतिं वन्वीत । यज्ञमेव तत्सम्भरतीति विज्ञायते ४

पूषा सन्येति सनीहारान्संशास्ति ५

चन्द्रमसीत्येतैर्यथालिङ्गं प्रतिगृह्णाति ६

देवः सविता वसोर्वसुदावेत्यन्यानि ७

वायवे त्वेति तासां नष्टामनुदिशति ८

वरुणाय त्वेत्यप्सु मृताम् ९

निरृत्यै त्वेत्यवसन्नां संशीर्णां वा १०