१७

उदितेषु नक्षत्रेषु पूर्ववद्वाचो विसर्गः १

एवमुपोदयं यमयति । उदित आदित्ये विसृजते २

मध्यन्दिने मध्यरात्रे च व्रतयति ३

अतिनीय वा मानुषं कालम् ४

सायं दुग्धमपररात्रे प्रातर्दुग्धमपराह्णे इत्येके ५

गार्हपत्ये दीक्षितस्य व्रतं श्रपयति । दक्षिणाग्नौ पत्न्याः ६

याग्निहोत्रस्य स्कन्नस्य प्रायश्चित्तिः सा व्रतस्य ७

अग्निहोत्रवत्तूष्णीमुन्नीयापरेणाहवनीयं व्रतमत्याहृत्य प्रयच्छन्नाह व्रत्य व्रतय व्रतमुपेहीति ८

दैवीं धियं मनामह इति हस्ताववनिज्य ये देवा मनोजाता मनोयुज इति दक्षिणेनाहवनीयं परिश्रिते व्रतयति ९

नैनमदीक्षिता व्रतयन्तं पश्यन्ति १०

शिवाः पीता भवथ यूयमापोऽस्माकं योनावुदरे सुशेवाः । इरावतीरनमीवा अनागसः शिवा नो भवथ जीवस इति व्रतयित्वा नाभिदेशमभिमृशते ११

अपश्च पीत्वा जपति १२

तूष्णीं पत्नी स्व आयतने व्रतयति १३