१५

यो ब्रह्मचारी स्त्रियमुपेयात्स गर्दभं पशुमालभेत १

भूमावकपालं पुरोडाशं श्रपयेत् २

अप्स्ववदानैश्चरेयुः ३

रक्षोदेवत्यः स्यान्निरृतिदेवत्यो वा ४

निरृतिं पाकयज्ञेन यजेत ५

यस्य हविः क्षायति तं यज्ञं निरृतिर्गृह्णाति । तत्संस्थाप्यान्यद्धविस्तद्दैवतं निर्वपेत् ६

अथैकेषाम् । यस्य पुरोडाशः क्षायति तं यज्ञं निरृतिर्गृह्णाति । यदुच्छिष्टं स्यात्तेन प्रचरेद्द्वेष्याय तां दक्षिणां हविरुच्छिष्टं च दद्यात् । तमेव निरृत्या ग्राहयतीति विज्ञायते ७

सर्वदाहे प्रायश्चित्तम् ८

यदि वावदानेभ्यो न प्रभवेत् ९

यद्यप्रत्तदैवतं हविर्व्यापद्येतान्यद्धविस्तद्दैवतं निर्वपेत् १०

तत्र स्रुगादानप्रभृतयो मन्त्रा आवर्तेरन् ११

यावदन्ते वा व्यापद्येत १२

यदि प्रत्तदैवतमाज्येन शेषं संस्थापयेत् १३

यस्य सर्वाणि हवींषि नश्येयुर्दुष्येयुरपहरेयुर्वाज्येनैता देवताः प्रतिसङ्ख्याय यजेत १४

अथान्यामिष्टिमनुल्बणां तन्वीत । यज्ञो हि यज्ञस्य प्रायश्चित्तिः १५

अपो व्यापन्नं हविरभ्यवहरतीति विज्ञायते १६

यदार्याणामभोजनीयं स्यान्न तेन यजेत १७

यस्य पुरोडाशो दुःशृतस्तद्धविर्यमदैवत्यं यममेव तद्गच्छतीति विज्ञायते । संस्थाप्य तदन्वाहार्यपचने चतुःशरावमोदनं पक्त्वा चतुरो ब्राह्मणान्भोजयेत् १८

तेषां भार्गवः प्राशितॄणामेकः स्यात् १९

योऽदक्षिणेन यज्ञेन यजेत स यज्ञः प्रक्षामोऽनायुः । उर्वरां दद्यात् २०

यद्यादिष्टां दक्षिणामन्तरियादुर्वरा प्रतिष्ठिता देया । सा प्रायश्चित्तिः २१

यद्यभागां देवतामावाहयेदाज्येनैनां यथोढां यजेत । पुरस्ताद्वा स्विष्टकृतः २२

यदि भागिनीं नावाहयेद्यत्र स्मरेत्तदुपोत्थाय मनसावाह्य यद्वो देवा अतिपादयानीत्याहुतिं जुहुयात् २३