०३

सहस्रशृङ्गो वृषभो जातवेदाः स्तोमपृष्ठो घृतवान्सुप्रतीकः । मा नो हासीन्मेत्थितो नेत्त्वा जहाम गोपोषं नो वीरपोषं च यच्छेत्येनमग्नौ प्रहरति १

प्रहृत्य वाभिजुहुयात् २

यदि कालसन्निकर्षेऽग्निर्मथ्यमानी न जायेत यत्रान्यं पश्येत्तत आहृत्य जुहुयात् ३

अथात्वरमाणः पुनर्मन्थेत् ४

यद्यन्यं न विन्देदजायै दक्षिणे कर्णे होतव्यम् ५

अजस्य तु ततो नाश्नीयात् ६

यद्यजां न विन्देद्ब्राह्मणस्य दक्षिणे हस्ते होतव्यम् ७

ब्राह्मणं तु वसत्यै नापरुन्धीत ८

यदि ब्राह्मणं न विन्देद्दर्भस्तम्बे होतव्यम् ९

दर्भांस्तु नाध्यासीत १०

यदि दर्भान्न विन्देदप्सु होतव्यम् ११

आपस्तु न परिचक्षीतेमा भोजनीया इमा अभोजनीया इति १२

अप्यभोजनीयस्यैतं संवत्सरं परिगृह्णीयादेवापः १३

अद्भिस्तु न पादौ प्रक्षालयीत १४

सांवत्सरिकाण्येतानि व्रतानीत्याश्मरथ्यः । यावज्जोवमित्यालेखनः १५

संवत्सरस्य परस्तादग्नये व्रतपतये पुरोडाशमष्टाकपालं निर्वपेत् १६

अग्नये क्षामवतेऽष्टाकपालं येषां पूर्वापरा अन्वञ्चः प्रमीयेरन् । गृहदाहे वा १७

अग्नये विविचयेऽष्टाकपालं यस्याहिताग्नेरन्यैरग्निभिरग्नयः संसृज्येरन्मिथो वा १८

अग्नये विपृचेऽष्टाकपालं यदि गार्हपत्याहवनीयौ १९

अग्निना विपृचा वयं गीर्भिः स्तोमं मनामहे । स नो रास्व सहस्रिणः । कविरग्निः समिध्यते विप्रो यज्ञस्य साधनः । विपृञ्चन्रास्व नो वस्विति याज्यानुवाक्ये २०

अग्नये वीतयेऽष्टाकपालं यदि गार्हपत्यदक्षिणाग्नी दक्षिणाग्न्याहवनीयौ वा २१

अग्नये शुचयेऽष्टाकपालं यदि प्रदाव्येनाभ्यादाह्येन शवाग्निना वा । अग्नये सङ्कुसुकायाष्टाकपालं यदि सूतकाग्निना । सङ्कुसुको कुसुको विकिरो यश्च विष्किरः । माषाज्येन नलेध्मेन क्रव्यादं शमयामसि । अस्मिन्वयं सङ्कुसुकेऽग्नौ रिप्राणि मृज्महे । अभूम यज्ञियाः शुद्धाः प्र ण आयूंषि तारिषदिति याज्यानुवाक्ये । अग्नयेऽप्सुमतेऽष्टाकपालं यदि वैद्युतेन २२

यदि सर्वाः सन्निपतेरन्विविचये निरुप्य शुचये निर्वपेद्व्रातभृतीं तृतीयामप्सुमतीं चतुर्थीं क्षामवतीमन्तं परिक्रमयेत् २३

व्रातभृतीं द्वितीयामेके समामनन्ति । व्रातपतीमुत्तमाम् २४