१७

प्रतिपुरुषमेककपालान्निर्वपति यावन्तो यजमानस्यामात्याः सस्त्रीकास्तावत एकातिरिक्तान् १

यावन्तो गृह्याः स्मस्तेभ्यः कमकरमिति निरुप्यमाणेषु यजमानो जपति २

तूष्णीमुपचरिता भवन्ति ३

उत्तरार्धे गार्हपत्यस्याधिश्रयति ४

तानभिघार्यानभिघार्य वोद्वास्यान्तर्वेद्यासाद्य पशूनां शर्मासीति मूते समावपति ५

मूतयोर्मूतेषु वा ६

कोशापिधानेन हरन्तीत्येकेषाम् ७

एक एव रुद्रो न द्वितीयाय तस्थ इति दक्षिणाग्नेरेकोल्मुकं धूपायद्धरति ८

उत्तरपूर्वमवान्तरदेशं गत्वाखुस्ते रुद्र पशुरित्याखूत्कर एकं पुरोडाशमुपवपति ९

असौ ते पशुरिति वा द्वेष्यं मनसा ध्यायन् १०

यदि न द्विष्यादाखुस्ते पशुरिति ब्रूयात् ११

चतुष्पथ एकोल्मुकमुपसमाधाय सम्परिस्तीर्य सर्वेषां पुरोडाशानामुत्तरार्धात्सकृत्सकृदवदाय मध्यमेनान्तमेना वा पलाशपर्णेन जुहोति १२