१६

ब्रह्माध्वर्युरग्नीद्यजमानश्च १

अपि वा न यजमानः २

समशो वा प्रतिविभज्यावघ्रेण भक्षयित्वा बर्हिषि लेपान्निमृजन्ते ३

उदकुम्भमादाय यजमानः शुन्धन्तां पितर इति त्रिः प्रसव्यं वेदिं परिषिञ्चन्पर्येति ४

निधाय कुम्भमया विष्ठा जनयन्कर्वराणीति त्रिरपरिषिञ्चन्प्रतिपर्येति ५

हविःशेषान्सम्प्लोम्नाय पिण्डान्कृत्वा तिसृषु स्रक्तिषु निदधाति पूर्वस्यां दक्षिणस्यामपरस्यामिति । एतत्ते ततासौ ये च त्वामन्वित्येतैः प्रतिमन्त्रम् ६

त्रीन्परान्पितॄनन्वाचष्टे । षष्ठं प्रथमे पिण्डे । पञ्चमं द्वितीये । चतुर्थं तृतीये ७

उत्तरस्यां स्रक्त्यां रिप्ललेपं निमृज्यात्र पितरो यथाभागं मन्दध्वमित्युक्त्वोदञ्चो निष्क्रम्य सुसंदृशं त्वा वयनित्यैन्द्र्यर्चाहवनीयमुपतिष्ठन्त ऐन्द्रीणां वा ८

आ तमितोरुपस्थायाक्षन्नमीमदन्त हीति पङ्क्त्या गार्हपत्यमुपतिष्ठन्ते ९

एतयैव परिश्रितं प्रविशन्ति १०

अत्रैके भक्षणपरिषेचने समामनन्ति ११

अवघ्रेण सर्वभक्षाः १२

आञ्जनादि पिण्डपितृयज्ञवदा पङ्क्त्याः १३

यदन्तरिक्षमिति पङ्क्त्या पुनरेति १४

विस्रस्य प्राचीनावीतानि यज्ञोपवीतानि कुर्वते । विपरिक्रामन्त्यृत्विजः । विपरिहरन्ति स्रुचः १५

अपकर्षन्ति परिश्रयणानि १६

औपभृतं जुह्वामानीयापबर्हिषावनूयाजौ यजति । देवौ यजेति प्रथमं सम्प्रेष्यति । यजेत्युत्तरम् १७

सूक्तवाकं प्रति निवीतानि कुर्वते १८

न पत्नीः संयाजयन्ति १९

न समिष्टयजुर्जुहोति २०

सर्वमन्यत्क्रियते २१

सन्तिष्ठते पितृयज्ञः २२