०९

ततश्चतुर्षु मासेषु पूर्वस्मिन्पर्वण्युपक्रम्य द्व्यहं साकमेधैर्यजते १

अग्नये ऽनीकवते पुरोडाशमष्टाकपालं निर्वपति साकं सूर्येणोद्यता २

साकं वा रश्मिभिः प्रचरन्ति ३

सिद्धमिष्टिः सन्तिष्ठते ४

मरुद्भ्यः सान्तपनेभ्यो मध्यंदिने चरुम् ५

न बर्हिरनुप्रहरति ६

सिद्धमिष्टिः सन्तिष्ठते ७

मरुद्भ्यो गृहमेधिभ्यः सर्वासां दुग्धे सायं चरुम् ८

यत्सान्तपनस्य बर्हिस्तद्गृहमेधीयस्य ९

अपि वा नेध्माबर्हिर्भवति । न सामिधेनीरन्वाह । न प्रयाजा इज्यन्ते नानूयाजाः १०

अयजुष्केण वत्सानपाकृत्यापवित्रेण गा दोहयति ११

स वै खलु पर्णशाखया वत्सानपाकृत्य पवित्रवति सन्दोह्य यथैतदमावास्यायां क्रियते तं चरुं श्रपयतीत्येके १२

अग्नीनन्वाधाय वेदं कृत्वाग्नीन्परिस्तीर्य पाणिप्रक्षालनादि कर्म प्रतिपद्यते । यथार्थं पात्राणि प्रयुनक्ति १३

स्थालीं कपालानां स्थाने १४

निर्वपणकाले १५