०७

कायानुब्रूहि कं यजेत्येककपाले सम्प्रैषौ १

नभश्च नभस्यश्चेति चतुर्भिर्मासनामभिरेककपालमभिजुहोति २

तदु हैके पृथगीडे निरवद्यन्ति । तदु तथा न कुर्यात् । सप्तानां हविषां समवदायाध्वर्युः प्रतिप्रस्थात्रे प्रयच्छति । तस्मिन्प्रतिप्रस्थाता मारुत्या अन्ववदधाति ३

उपहूतां प्राश्नन्ति ४

यः प्रवया इवर्षभः स दक्षिणा ५

कामं तु ततो भूयो दद्यात् ६

धेनुर्दक्षिणेत्येके ७

परिवत्सरीणां स्वस्तिमाशास्ते । दिव्यं धामाशास्त इति सूक्तवाकस्याशिःषु होतानुवर्तयते । एवं यजमानो जपति । आशास इति मन्त्रं सन्नमति ८

उभौ वाजिनाभ्यां प्रचरतः ९

शेषौ समवनीयोत्तरे विहारे पूर्ववद्भक्षयन्त्या मा विशन्त्विन्दव आ गल्गा धवनीनां रसेन मे रसं पृण । तस्य ते वाजोभिर्भक्षङ्कृतस्येति समानम् १०

पूर्णपात्रवज पूर्ववदिष्टिं संस्थापयति ११

पूर्णपात्रस्य स्थाने सौमिकोऽवभृथः १२

चतुर्गृहीतान्याज्यानि १३

वारुण्यै निष्कासेन तुषैश्चावभृथमवयन्ति १४

तुषा ऋजीषधर्मं लभन्ते १५

वारुणमेककपालमेके समामनन्ति १६

नायुर्दां नाभिप्रव्रजनमन्त्रं न साम गायति १७

सर्वा दिशोऽवभृथगमनमाम्नातम् १८

नोदीचीरभ्यवेत्या इत्येके १९

यां दिशं गच्छेयुस्तथामुखाः प्रचरेयुरित्येके २०

वहन्तीनां स्थावरा अभ्यवेत्याः २१

तदभावे याथाकामी २२

उदकान्ते स्तरणान्तां वेदिं कृत्वा तस्यां हवींषि सादयति २३

अपि वा न वेदिः २४

शतं ते राजन्भिषजः सहस्रमित्यपो दृष्ट्वा जपति २५

अभिष्ठितो वरुणस्य पाश इत्युदकान्तमभितिष्ठन्ते २६

अपः प्रगाह्य तिष्ठन्तोऽवभृथेन चरन्ति २७

तृणं प्रहृत्य स्रौवमाघारयति २८

यदि वा पुरा तृणं स्यात्तस्मिञ्जुहुयात् २९