०५

ततश्चतुर्षु मासेष्वाषाढ्यां श्रवणायां वोदवसाय वरुणप्रघासैर्यजते १

प्ररूढकक्षे यष्टव्यमिति बह्वृचब्राह्मणं भवति २

तस्य वैश्वदेववत्कल्पः ३

वेदौ कृत्वाग्रेण गार्हपत्यं समे प्राची वेदी भवतः ४

उत्तरामध्वर्युः करोति दक्षिणां प्रतिप्रस्थाता । उत्तरे विहारेऽध्वर्युश्चरति दक्षिणे प्रतिप्रस्थाता ५

उभयत्र कृत्स्नं तन्त्रम् ६

अपि पत्नीसंयाजाः ७

एकवत्सम्प्रैषः ८

द्विवद्ब्रह्मानुजानाति ९

द्व्यङ्गुलं त्र्यङ्गुलं चतुरङ्गुलं पृथमात्रं रथवर्त्ममात्रं मीतामात्रं प्रादेशमात्रेण वा तिर्यगसम्भिन्ने वेदी भवतः १०

अन्तरा वेदी प्रतिप्रस्थातुः सञ्चरः ११

अपरेणोत्तरां वेदिं स्तम्बयजुर्हरन्नाध्वर्युमभिपरिहरति १२

उत्करे निवपति १३

समान उत्करः १४

पञ्चर्त्विजः १५

यदेवाध्वर्युः करोति तत्प्रतिप्रस्थाता १६

यत्किञ्च वाचाकर्मीणमध्वर्युरेव तत्कुर्यात् १७

युगपत्कालान्वा निगदान् १८

साधारणद्रव्यांश्च संस्कारान् १९

प्रागुत्तरात्परिग्राहात्कृत्वैकस्फ्यया वेदी अनुसम्भिनत्ति । दक्षिणस्या उत्तरायै श्रोणेः प्रक्रम्या दक्षिणादंसादुत्तरस्याः २०

उत्तरस्यां वेद्यां पशुबन्धवदुत्तरवेदिमुपवपति २१

काले पशुबन्धवद्गार्हपत्यादग्नी प्रणयतः २२

नोद्यतहोमौ जुहुतः २३

अन्तरा वेदी प्रतिप्रस्थाता प्रतिपद्यते । उत्तरेणोत्तरां वेदिमध्वर्युः २४

पूवोऽध्वर्युरुत्तरवेद्यामग्निं प्रतिष्ठापयति । जघन्यः प्रतिप्रस्थाता दक्षिणस्याम् २५

अग्नीनन्वाधाय पृथक् शाखे आहरतः २६

तथेध्माबर्हिषी २७

मारुत्याः प्रतिप्रस्थाता वत्सानपाकरोति । वारुण्या अध्वर्युः २८

शमीमय्यो हिरण्मय्यो वा स्रुचो भवन्ति २९

यथादेवतं सायन्दोहौ दोहयतः ३०

सद्यस्काला वा वरुणप्रघासाः ३१

एवं सति लौकिकेन दध्नामिक्षाकर्म स्यात् ३२

प्रातर्दोहविकारमेक आमिक्षापयस्यमाहुः ३३

निर्वपणकाल आग्नेयमष्टाकपालमिति नवोत्तराणि हवींषि निर्वपति ३४

सर्वे यवा भवन्ति ३५

अपि वा पौष्णः करम्भपात्राणि मेषाविति यवानां व्रीहीणामितराणि ३६

एतस्मिन्काले प्रतिप्रस्थाता तूष्णीं करम्भपात्रार्थान्यवान्निर्वपति ३७

यजुषाध्वर्युर्मेषार्थान् । मेष्यर्थान्प्रतिप्रस्थाता ३८

तयोरामिक्षावद्दैवतम् ३९

आमपेषाणां पत्नी करम्भपात्राणि करोति ४०

यावन्तो यजमानस्यामात्याः सस्त्रीकास्तावन्त्येकातिरिक्तानि ४१

आमपेषाणां भेषप्रतिकृती भवतः ४२

मेषमध्वर्युः करोति मेषीं प्रतिप्रस्थाता ४३