१०

यूपायाज्यमानायानुब्रूहीति सम्प्रेष्यत्यज्यमानायानुब्रूह्यञ्ज्मो यूपमनुब्रूहीति वा १

अथैनमसंस्कृतेनाज्येन यजमानोऽग्रतः शकलेनानक्ति २

ऐन्द्रमसीति चषालमक्त्वा सुपिप्पलाभ्यस्त्वौषधीभ्य इति प्रतिमुच्य देवस्त्वा सविता मध्वानक्त्विति स्रुवेण सन्ततमविच्छिन्दन्नग्निष्ठामश्रिमनक्त्योपरात् ३

रशनादेशे त्रिः सर्वतो यूपं सम्मृशति ४

अञ्जनादि यूपं यजमानो नोत्सृजात्या परिव्ययणात् ५

यूपायोच्छ्रीयमाणायानुब्रूहीति सम्प्रेष्यत्युच्छ्रीयमाणायानुब्रूहीति वा ६

उद्दिवं स्तभानान्तरिक्षं पृणेत्युच्छ्रयति ७

ते ते धामानीत्यवटेऽवदधाति ८

विष्णोः कर्माणि पश्यतेति द्वाभ्यामाहवनीयेनाग्निष्ठां सम्मिनोति ९

यं कामयेत तेजसैनमित्युक्तम् १०

अग्रमाहवनीयमुपनतं यूपस्यावनतं मूलम् ११

अनाविरुपरं कृत्वा ब्रह्मवनिं त्वा क्षत्रवनिमिति प्रदक्षिणं पांसुभिः पर्यूह्य ब्रह्म दृंह क्षत्रं दृंहेति मैत्रावरुणदण्डेन समं भूमिपरिदृंहणं कृत्वा १२