०१

सर्वांल्लोकान्पशुबन्धयाज्यभिजयति १

तेन यक्ष्यमाणोऽमावास्यायां पौर्णमास्यां वा षड्ढोतारं मनसानुद्रुत्याहवनीये सग्रहं जुहोति सूर्यं ते चक्षुरिति २

आग्नावैष्णवमेकादशकपालं निर्वपति ३

अग्न्यन्वाधानस्य प्रत्याम्नायो भवति ४

सिद्धमिष्टिः सन्तिष्ठते ५

धारयत्याहवनीयम् ६

उरु विष्णो विक्रमस्वेति स्रुवेणाहवनीये यूपाहुतिं जुहोति ७

स्रुचा वा चतुर्गृहीतेन ८

न दीक्षितस्य जुहुयात् ९

वैष्णवीमृचमनूच्याच्छेत्यः १०

जुहुयाद्वा ११

यूपसकाशे वाग्निं मथित्वा तस्मिञ्जुहुयात् १२

स्रुवमाज्यशेषं चाध्वर्युरादत्ते । तक्षा शस्त्रम् १३

यत्र यूपस्तद्यन्ति १४

यूप्या वृक्षाः पलाशखदिरबिल्वरौहीतकाः १५

पालाशं तेजस्कामो यज्ञकामो वा । खादिरं स्वर्गकामो वीर्यकामो वा । बैल्वमन्नाद्यकामो ब्रह्मवर्चसकामो वा । रौहीतकं प्रजाकामश्चक्षुष्कामो वा १६

समे जातमशाखाजं बहुपर्णशाखमप्रतिशुष्काग्रमसुषिरमव्यावृत्तमघूर्णमृजुमूर्ध्वमूर्ध्वशकलमग्र ईषदुपावनतं प्रागुदक् प्रत्यग्वौपनतम् १७

यं कामयेताप्रतिष्ठितः स्यादित्युक्तम् १८

अतिक्रम्य यूप्यान्यं जोषयते तमभिमन्त्रयते १९