३०

सर्वहुतमपर्यावर्तयन्नृजुं प्रतिष्ठितं न हस्तेन जुहुयात् १

यदि हुतः पर्यावर्तेत स्रुचोऽग्रेण कल्पयेत् २

न पाणिना ३

वरे दत्ते कल्पयितव्यः ४

आधायाभिघार्य पुनर्होतव्य इत्येके ५

अपि वा नैककपालं कुर्वीताज्येन द्यावापृथिवी यजेत ६

ये प्राचीनमेकाष्टकाया वत्सा जायन्ते तेषां प्रथमजं ददाति । वासः श्यामाके ७

भद्रान्नः श्रेयः समनैष्ट देवा इति यजमानभागं प्राश्नाति ८

सर्वेषाम् वा भक्षाणां मन्त्रवतां प्रत्याम्नायः स्यात् ९

अग्निः प्रथमः प्राश्नातु स हि वेद यथा हविः । शिवा अस्मभ्यमोषधीः कृणोतु विश्वचर्षणिरिति श्यामाकानाम् १०

सिद्धमिष्टिः सन्तिष्ठते ११

अपि वामावास्यायां पौर्णमास्यां वाग्रयणेष्टिमन्वायातयेत् १२

अपि वामावास्यां पौर्णमासीं वा नवैर्यजेत् १३

अपि वाग्निहोत्रीं व्रीहिस्तम्बं यवस्तम्बं वा ग्रासयित्वा तस्याः पयसा सायम्प्रातर्जुहुयात् १४

अपि वा नवानां यवाग्वा सायम्प्रातर्जुहुयात् १५

अपि वा नवानां गार्हपत्ये स्थालीपाकं श्रपयित्वाहवनीये जुहुयादाग्रयणदेवताभ्यः स्विष्टकृच्चतुर्थाभ्यः १६

अपि वा नवानां चतुःशरावमोदनं पक्त्वा चतुरो ब्राह्मणान्भोजयेत् १७

एवं यवैर्यजेत् १८

तत्राग्नेयश्यामाकौ न भवतः १९

य ऊर्ध्वमेकाष्टकाया वत्सा जायन्ते तेषां प्रथमजं ददाति । एतमु त्यं मधुना संयुतं यवं सरस्वत्या अधि मनावचर्कृषुः । इन्द्र आसीत्सीरपतिः शतक्रतुः कीनाशा आसन्मरुतः सुदानव इति यजमानभागं प्राश्नाति । सर्वेषां वा भक्षाणां मन्त्रवतां प्रत्याम्नायः स्यात् २०

सिद्धमिष्टिः सन्तिष्ठते २१