२८

सगृहः प्रयास्यन्वास्तोष्पतीयं जुहोति १

अहुते यानेषु भण्डान्यारोपयन्ति २

न हीनमन्वाहरेयुः ३

यद्यनोवाह्यं स्यात्पूर्वं तं प्रवहेयुरप वोद्धरेयुः ४

यत्र संहिता रात्रीर्वसेत्पञ्च सप्त नव दश वा तत्प्रयास्युञ्जुहुयात् ५

नवरात्रवास्तौ वा पुनरेत्यैकामुषित्वा प्रयास्यञ्जुहुयात् ६

दक्षिणो युक्तो भवति सव्यो ऽयुक्तः । अपि वाग्निष्ठस्य दक्षिणो युक्तः सव्यस्य योक्त्रं परिहृतम् । सर्वेषु वा युक्तेषु ७

वास्तोष्पत इत्यनुद्रुत्योत्तरया गार्हपत्ये हुत्वावक्षाणानि सम्प्रक्षाप्य पृथगरणीष्वग्नीन्समारोपयते ये धार्यन्ते ८

उपर्यग्नावरणी धारयञ्जपत्ययं ते योनिरृत्विय इति ९

अपि वा यजमान एवात्मन्समारोपयते १०

या ते अग्ने यज्ञिया तनूस्तयेह्यारोहात्मात्मानमच्छा वसूनि कृण्वन्नस्मे नर्या पुरूणि । यज्ञो भूत्वा यज्ञमासीद स्वां योनिं जातवेदो भुव आजायमानः स क्षय एहीति हस्तं प्रताप्य मुखायाहरते ११

वास उपावरोह जातवेदः ह्पुनस्त्वं देवेभ्यो हव्यं वह नः प्रजानन् । आयुः प्रजां रयिमस्मासु धेह्यजस्रो दीदिहि नो दुरोण इति लौकिकेऽग्नावुपावरोहयति १२

अरण्योर्वोपावरोह्य मन्थेत् १३

यदरण्योः समारूढः स्यान्निर्वर्तमान एतं मन्त्रं जपेत् १४