२७

ये ते अग्ने वानस्पत्याः सम्भाराः सम्भृताः सह । तेभिर्गच्छ वनस्पतीन्स्वां योनिं यथायथम् । अगन्नग्निर्यथालोकमसदत्सदने स्वे । अवीरहत्यं देवेषूपागां मनसा सहेति पुरस्तात्स्विष्टकृतः सप्ताहुतीर्जुहोति १

सिद्धमिष्टिः सन्तिष्ठते २

पौर्णमासीमिष्ट्वा ज्वलतोऽग्नीनुत्सृजति ३

संवत्सरं परार्ध्यमुत्सृष्टाग्निर्भवति ४

रोहिणी पुनर्वसू अनुराधा इति नक्षत्राणि ५

वर्षासु शरदि वादधीत ६

कृताकृताः सम्भारा यजूंषि च भवन्ति ७

अपि वा पञ्च पार्थिवान्सम्भारानाहरति एवं वानस्पत्यान् ८

आयतनेषु पुराणान्दर्भान्संस्तीर्य भूमिर्भूम्नेति सर्पराज्ञीभिर्गार्हपत्यमादधाति ९

मध्यन्दिन इतरान् १०

उपोलवैर्दर्भैः परुत्कैः संवत्सरप्रवातैराहवनीयं ज्वलन्तमुद्धरति ११

यत्त्वा क्रुद्धः परोवपेति दक्षिणाग्निम् । यत्ते मन्युपरोप्तस्येतीतरान् १२

मनो ज्योतिर्जुषतामिति बृहस्पतिवत्यर्चोपतिष्ठते १३

सप्त ते अग्ने समिधः सप्त जिह्वा इत्यग्निहोत्रं जुहोति १४