१४

यो ब्राह्मणो राजन्यो वैश्यः शूद्रो वासुर इव बहुपुष्टः स्यात्तस्य गृहादाहृत्यादध्यात्पुष्टिकामस्य १

गृहे त्वस्य ततो नाश्नीयात् २

अम्बरीषादन्नकामस्य वृक्षाग्राज्ज्वलतो ब्रह्मवर्चसकामस्य ३

वामदेव्यमभिगायत आहवनीय उद्घ्रियमाणे ४

प्राचीमनु प्रदिशमित्येषा । विक्रमस्व महाँ असि वेदिषन्मानुषेभ्यः । त्रिषु लोकेषु जागृहि प्रजया च धनेन च । इमा उ मामुपतिष्ठन्तु राय आभिः प्रजाभिरिह संवसेय । इहो इडा तिष्ठतु विश्वरूपी मध्ये वसोर्दीदिहि जातवेद इति प्राञ्चोऽश्वप्रथमा अभिप्रव्रजन्ति ५

दक्षिणतो ब्रह्मा रथं रथचक्रं वा वर्तयति यावच्चक्रं त्रिः परिवर्तते ६

षट्कृत्वो द्वेष्यस्य ७

जानुदघ्ने धारयमाणस्तृतीयमध्वनोऽग्निं हरति नाभिदघ्ने तृतीयमास्यदघ्ने तृतीयम् । न कर्णदघ्नमत्युद्गृह्णाति ८

तद्युद्गृह्य निगृह्णीयान्मुखेन सम्मायादध्यात् ९

नाग्निमादित्यं च व्यवेयात् १०

दक्षिणतः परिगृह्य हरति ११

अर्धाध्वे यजमानो वरं ददाति १२

अर्धाध्वे हिरण्यं निधाय नाकोऽसि ब्रध्नः प्रतिष्ठा सङ्क्रमण इत्यतिक्रामति १३

प्राञ्चमश्वमभ्यस्थाद्विश्वा इति दक्षिणेन पदोत्तरतः सम्भारानाक्रमयति यथाहितस्याग्नेरङ्गाराः पदमभ्यववर्तेरन्निति १४

प्रदक्षिणमावर्तयित्वा यदक्रन्द इति पुनरेवाक्रमयति १५

पुरस्तात्प्रत्यञ्चमश्वं धारयति १६

पूर्ववाडश्वो भवति १७

तदभावेऽनङ्घान्पूर्ववाडेतानि कर्माणि करोतीति पैङ्गायनिब्राह्मणं भवति १८