०७

समित्सु तिस्रो वत्सतरीर्ददाति १

प्राश्नन्ति ब्राह्मणा ओदनम् २

प्राशितवद्भ्यः समानं वरं ददाति ३

यस्मिन्नक्षत्रेऽग्निमाधास्वन्स्यात्तस्मिन्संवत्सरे पुरस्तादेताः समिध आदध्याद्द्वादशाहे द्व्यहे त्र्य ह एकाहे वा ४

आधेयास्त्वेवाग्निमादधानेन ५

अथ व्रतं चरति न मांसमश्नाति न स्त्रियमुपैति नास्याग्निं गृहाद्धरन्ति नान्यत आहरन्ति ६

ब्राह्मौदनिकेन संवत्सरमासीत ७

औपासनश्चेदाहित एतस्मिन्नस्याग्निकर्माणि क्रियन्ते ८

न प्रयायात् ९

नानुगच्छेत् १०

यदि प्रयायादनु वा गच्छेद्ब्रह्मौदनं पक्त्वैतयैवावृता समिध आदध्यात् ११

यद्येनं संवत्सरेऽग्न्याधेयं नोपनमेद्ब्रह्मौदनं पक्त्वा समिध आधाय यदैनमुपनमेदथादधीत १२

तस्य याथाकामी भरणकल्पानाम् १३

द्वादशाहं चरेदेकाहं वा १४

श्व आधास्यमानः पुनर्ब्रह्मौदनं पचति १५

योऽस्याग्निमाधास्यन्स्यात्स एतां रात्रिं व्रतं चरति न मांसमश्नाति न स्त्रियमुपैति १६

प्रजा अग्ने संवासयाशाश्च पशुभिः सह । राष्ट्राण्यस्मा आधेहि यान्यासन्सवितुः सव इत्युत्तरेण गार्हपत्यायतनं कल्माषमजं बध्नाति १७