१४

दधिक्राव्णो अकारिषमिति सायन्दोहम् । इदं हविरिति प्रातर्दोहम् १

नाब्राह्मणः सान्नाय्यं प्राश्नीयात् २

अन्तर्वेदि प्रणीतास्वध्वर्युः सन्ततामुदकधारां स्रावयति । सदसि सन्मे भूया इत्यानीयमानायां जपति ३

प्राच्यां दिशि देवा ऋत्विजो मार्जयन्तामित्येतैर्यथालिङ्गं व्युत्सि च्य समुद्रं वः प्रहिणोमि स्वां योनिमपिगच्छत । अच्छिद्रः प्रजया भूयासं मा परासेचि मत्पय इत्यन्तर्वेदि शेषं निनीय यदप्सुते सरस्वति गोष्ठश्वेषु यन्मधु । तेन मे वाजिनीवति मुखमङ्ग्ध सरस्वति । या सरस्वती वैशम्बल्या तस्यां मे रास्व तस्यास्ते भक्षीय तस्यास्ते भूयिष्ठभाजो भूयास्मेति मुखं विमृष्टे ४

उभौ कपालविमोचनं जपतः ५

विष्णोः क्रमोऽसीति दक्षिणे वेद्यन्ते दक्षिणेन पदा चतुरो विष्णुक्रमान्प्राचः क्रामत्युत्तरमुत्तरं ज्यायांसमनतिहरन्सव्यम् ६

नाहवनीयमतिक्रामति ७

अवस्थाय चतुर्थं जपति ८

विष्णुक्रमान्विष्ण्वतिक्रमानतीमोक्षानिति व्यतिषक्तानेके समामनन्ति । विनिरूढानेके ९

अग्निना देवेन पृतना जयामीति विष्ण्वतिक्रमाः । ये देवा यज्ञहन इत्यतीमोक्षाः १०

अगन्म सुवः सुवरगन्मेत्यादित्यमुपतिष्ठते ११