०३

दक्षिणेनाहवनीयमवस्थाय व्रतमुपैष्यन्समुद्रं मनसा ध्यायति १

अथ जपत्यग्ने व्रतपते व्रतं चरिष्यामीति ब्राह्मणः । वायो व्रतपत आदित्य व्रतपते व्रतानां व्रतपते व्रतं चरिष्यामीति राजन्यवैश्यौ २

सर्वान्वा ब्राह्मणः ३

अथादित्यमुपतिष्ठते सम्राडसि व्रतपा असि व्रतपतिरसि तत्ते प्रब्रवीमि तच्छकेयं तेन शकेयं तेन राध्यासमिति ४

यद्यस्तमिते व्रतमुपेयादाहवनीयमुपतिष्ठन्नेतद्यजुर्जपेत् ५

उभावग्नी उपस्तृणते देवता उपवसन्तु मे । अहं ग्राम्यानुपवसामि मह्यं गोपतये पशूनिति सायं परिस्तीर्यमाणेषु जपति ६

आरण्यं सायमाशेऽश्नात्यमाषममांसम् ७

अपि वा काममा मार्गादा मधुन आ प्राशातिकात् ८

अपो वा । न वा किञ्चित् ९

न तस्य सायमश्नीयाद्येन प्रातर्यक्ष्यमाणः स्यात् १०

आरण्यायोपवत्स्यन्नपोऽश्नाति न वा ११

जञ्जभ्यमानो ब्रूयान्मयि दक्षक्रतू इति १२

अमावास्यां रात्रिं जागर्ति १३

अपि वा सुप्यादुपरि त्वेव न शयीत १४

अपि वोपरि शयीत ब्रह्मचारी त्वेव स्यात् १५

उभयत्र जागरणमेके समामनन्ति १६

आहवनीयागारे गार्हपत्यागारे वा शेते १७