१७

यावत्यः कुम्भ्यस्तावन्तो ब्राह्मणा दक्षिणतौपवीतिन उपोत्थाय कुम्भीभ्यः पात्राणि पूरयित्वा तैरध्वर्युं जुह्वतमनु जुह्वति १

स्विष्टकृद्भक्षाश्च न विद्यन्ते २

समानमत ऊर्ध्वम् । सन्तिष्ठते साकम्प्रस्थायीयः ३

दाक्षायणयज्ञेन सुवर्गकामः ४

द्वे पौर्णमास्यौ द्वे अमावास्ये यजेत ५

आग्नेयोऽष्टाकपालो ऽग्नीषोमीय एकादशकपालः पूर्वस्यां पौर्णमास्यामाग्नेयोऽष्टाकपाल ऐन्द्रं दध्युत्तरस्याम् । आग्नेयोऽष्टाकपाल ऐन्द्राग्न एकादशकपालः पूर्वस्याममावास्यायामाग्नेयोऽष्टाकपालो मैत्रावरुण्यामिक्षा द्वितीयोत्तरस्याम् ६

व्यावृत्काम इत्युक्तम् ७

ऋत्वे वा जायामुपेयात् ८

सोऽयं दर्शपूर्णमासयोः प्रक्रमे विकल्पोऽनेन दर्शपूर्णमासाभ्यां वा यजेत ९

तेन पञ्चदश वर्षाणीष्ट्वा विरमेद्यजेत वा १०

सन्तिष्ठते दाक्षायणयज्ञः ११

एतेनैडादधः सार्वसेनियज्ञो वसिष्ठयज्ञः शौनकयज्ञश्च व्याख्याताः १२