०७

न्यञ्चं हस्तं पर्यावर्तयन् १

अग्नीद्गमयेति सम्प्रेष्यति २

त्रिरञ्जलिनाग्नीध्रोऽविष्वञ्चं प्रस्तरमूर्ध्वमुद्यौति रोहितेन त्वाग्निर्देवतां गमयत्वित्येतैः प्रतिमन्त्रम् ३

अथैनमाहाग्नीध्रोऽनुप्रहरेति ४

यत्प्रस्तरात्तृणमपात्तं तदनुप्रहरति स्वगा तनुभ्य इति ५

एतदेतदिति त्रिरङ्गुल्या निर्दिश्याग्निमभिमन्त्रयत आयुष्मा अग्नेऽस्यायुर्मे पाहीति ६

ध्रुवासीत्यन्तर्वेदि पृथिवीमभिमृशति ७

अथैनमाहाग्नीध्रः संवदस्वेति ८

अगानग्नीदित्यध्वर्युराह । अगन्नित्याग्नीध्रः । श्रावयेत्यध्वर्युः । श्रौषडित्याग्नीध्रः ९

मध्यमं परिधिमन्वारभ्य सम्प्रेष्यति स्वगा दैव्याहोतृभ्यः स्वस्तिर्मानुषेभ्यः शंयोर्ब्रूहीति १०

अनूच्यमाने शंयुवाक आहवनीये परिधीन्प्रहरति ११

यं परिधिं पर्यधत्था इति मध्यमम् । यज्ञस्य पाथ उपसमितमितीतरौ १२

उत्तरार्ध्यस्याग्रमङ्गारेषूपोहति १३

यजमानं प्रथतेति परिधीनभिमन्त्र्य जुह्वामुपभृतोऽग्रमवधाय संस्रावभागा इति संस्रावेणाभिजुहोति १४

अत्रैवर्त्विजो हविः शेषान्भक्षयन्ति १५