१४

समारभ्योर्ध्वो अध्वर इति प्राञ्चमुदञ्चमृजुं सन्ततं ज्योतिष्मत्याघारयन्सर्वाणीध्मकाष्ठानि संस्पर्शयति १

यं कामयेत प्रमायुकः स्यादिति जिह्मं तस्येत्युक्तम् २

ऊर्ध्वमाघार्य विच्छिन्द्याद्द्वेष्यस्य ३

व्यृषण्वा ४

न्यञ्चं वृष्टिकामस्य ५

द्वेष्यस्येत्येके ६

ऊर्ध्वमाघारं स्वर्गकामस्य भूयिष्ठमाहुतीनां जुहुयात् ७

अपि वा नाघारयेत्पूर्वार्धे मध्ये पश्चार्धे वा जुहुयात् ८

हुत्वाभिप्राणिति ९

बृहद्भा इति स्रुचमुद्गृह्य पाहि माग्ने दुश्चरितादा मा सुचरिते भजेत्यसंस्पर्शयन्स्रुचौ प्रत्याक्रामति १०

एते एवाक्रमणप्रत्याक्रमणे मन्त्रवती भवतः ११

मखस्य शिरोऽसीति जुह्वा ध्रुवां द्विस्त्रिर्वा समनक्ति १२

उन्नीतं राय इति स्रुवेण ध्रुवाया आज्यमादाय सुवीराय स्वाहेति जुहूमभिघार्य जुह्वोऽपादाय यज्ञेन यज्ञः सन्तत इति ध्रुवां प्रत्यभिघार्यायतने स्रुचौ सादयित्वा १३