१३

इध्मसन्नहनैः सहस्फ्यैरृतेस्फ्यैर्वाग्नीध्रोऽनुपरिक्रामं परिधीन्यथापरिधितमन्वग्रं त्रिस्त्रिः सम्मृज्याग्ने वाजजिद्वाजं त्वा सरिष्यन्तं वाजं जेष्यन्तं वाजिनं वाजजितं वाजजित्यायै सम्मार्ज्म्यग्निमन्नादमन्नाद्यायेति त्रिरग्निं प्राञ्चम् १

भुवनमसीत्यग्रेण ध्रुवां जुहूं वाञ्चलिं कृत्वा जुह्वेहीति जुहूमादत्त उपभृदेहीत्युपभृतम् २

सुयमे मे अद्य घृताची भूयास्तं स्वावृतौ सूपावृतावित्युपभृति जुहूमत्यादधाति ३

मुखतोऽभिहृत्य मुखत उपावहरति ४

सर्वत्रैवमत्याधानोपावहरणे भवतः ५

न च संशिञ्जयति नाभिदेशे च स्रुचौ धारयति ६

अग्नाविष्णू मा वामवक्रमिषमित्यग्रेण स्रुचोऽपरेण मध्यमं परिधिमनवक्रामं प्रस्तरं दक्षिणेन पदा दक्षिणातिक्रामत्युदक् सव्येन ७

एतद्वा विपरीतम् ८

विष्णो स्थानमसीत्यवतिष्ठते ९

अन्तर्वेदि दक्षिणः पादो भवत्यवघ्रः सव्यः १०

अथोर्ध्वस्तिष्ठन्दक्षिणं परिधिसन्धिमन्ववहृत्य ११