०९

दर्भैर्वेदिमन्तर्धाय दक्षिणतः सन्नहनं स्तृणात्यक्ष्णया वा १

ऊर्णाम्रदसं त्वा स्तृणामीति बर्हिषा वेदिं स्तृणाति बहुलमनतिदृश्यं प्रागपवर्गं प्रत्यगपवर्गं वा त्रिधातु पञ्चधातु वा २

अग्रैर्मूलान्यभिच्छादयति ३

धातौधातौ मन्त्रमावर्तयति ४

प्रस्तरपाणिः संस्पृष्टान्परिधीन्परिदधाति गन्धर्वोऽसि विश्वावसुरित्येतैः प्रतिमन्त्रमुदगग्रं मध्यमं प्रागग्रावितरौ ५

आहवनीयमभ्यग्रं दक्षिणमवाग्रमुत्तरम् ६

सूर्यस्त्वा पुरस्तात्पात्वित्याहवनीयमभिमन्त्र्योपर्याहवनीये प्रस्तरं धारयन्नग्निं कल्पयति ७

अनूयाजार्थे प्राची उल्मुके उदूहतीति वाजसनेयकम् ८

मध्यमं परिधिमुपस्पृश्योर्ध्वे आघारसमिधावादधाति ९

वीतिहोत्रं त्वा कव इति दक्षिणां समिदस्यायुषे त्वेत्युत्तराम् १०

तूष्णीं वा ११

समावनन्तर्गर्भौ दर्भौ विधृती कुरुते १२

विशो यन्त्रे स्थ इत्यन्तर्वेद्युदगग्रे निधाय वसूनां रुद्राणामादित्यानां सदसि सीदेति तयोः प्रस्तरमत्यादधाति १३

अभिहृततराणि प्रस्तरमूलानि बर्हिर्मूलेभ्यः १४

जुहूरसि घृताचीत्येतैः प्रतिमन्त्रमनूचीरसंस्पृष्टाः स्रुचः प्रस्तरे सादयति १५