०३

प्राञ्चौ वेद्यंसावुन्नयति प्रतीची श्रोणी १

पुरस्तादंहीयसी पश्चात्प्रथीयसी मध्ये सन्नततरा भवति २

यन्मूलमतिशेते स्फ्येन तच्छिनत्ति न नखेन ३

यत्पुरीषमतिशेत उत्करे तन्निवपति ४

आहार्यपुरीषां पशुकामस्य कुर्यात् ५

यत्प्राक् खननात्तत्कृत्वा यदाहरेत्तन्मन्त्रेण खनेत् ६

ब्रह्मन्नुत्तरं म्परिग्राहं परिग्रहीष्यामीति ब्रह्माणमामन्त्र्य स्फ्येन वेदिं परिगृह्णात्यृतमसीति दक्षिणतः । ऋतसदनमसीति पश्चात् । ऋतश्रीरसीत्युत्तरतः ७

विपरीतौ परिग्राहावेके समामनन्ति ८

धा असि स्वधा असीति प्रतीचीं वेदिं स्फ्येन योयुप्यते ९

उदादाय पृथिवीं जीरदानुरिति वेदिमनुवीक्षते १०

पश्चार्धे वेदेर्वितृतीयदेशे स्फ्यं तिर्यञ्चं स्तब्ध्वा सम्प्रेष्यति प्रोक्षणीरासादयेध्माबर्हिरुपसादय स्रुवं च स्रुचश्च सम्मृड्ढि पत्नीं सन्नह्याज्येनोदेहीति ११

अपि वा न सम्प्रैषं ब्रूयात् १२

प्रोक्षणीरभिपूर्योदञ्चं स्फ्यमपोह्य दक्षिणेन स्फ्यमसंस्पृष्टा उपनिनीय स्फ्यस्य वर्त्मन्सादयत्यृतसधस्थेति द्वेष्यं मनसा ध्यायन् १३

शतभृष्टिरसि वानस्पत्यो द्विषतो वध इति पुरस्तात्प्रत्यञ्चमुत्करे स्फ्यमुदस्यति द्वेष्यं मनसा ध्यायन् १४

नानवनिज्य हस्तौ पात्राणि पराहन्ति १५

हस्ताववनिज्य स्फ्यं प्रक्षालयत्यग्रमप्रतिमृशन् १६

उत्तरेणाहवनीयं प्रागग्रमिध्माबर्हिरुपसादयति दक्षिणमिध्ममुत्तरं बर्हिः १७