१२

निष्टप्तं रक्षो निष्टप्तोऽघशंस इति गार्हपत्ये सान्नाय्यपात्राणि प्रतितय्य धृष्टिरसि ब्रह्म यच्छेत्युपवेषमादाय निरूढं जन्यं भयं निरूढाः सेना अभीत्वर्रारिति गार्हपत्यादुदीचोऽङ्गारान्निरूह्य मातरिश्वनो घर्मोऽसीति तेषु कुम्भीमधिश्रयति १

अप्रस्रंसाय यज्ञस्योखे उपदधाम्यहम् । पशुभिः सन्नीतं बिभृतामिन्द्राय शृतं दधीति वा २

भृगूणामङ्गिरसां तपसा तप्यस्वेति प्रदक्षिणमङ्गारैः पर्यूह्य वसूनां पवित्रमसीति तस्यां प्रागग्रं शाखापवित्रमत्यादधाति ३

उदक् प्रातः ४

कुम्भीमन्वारभ्य वाचं यच्छति ५

पवित्रं वा धारयन्नास्ते ६

अदित्यै रास्नासीत्यभिधानीमादत्ते ७

त्रयस्त्रिंशेऽसि तन्तूनां पवित्रेण सहागहि । शिवेयं रज्जुरभिधान्यघ्नियामुपसेवतामित्यादीयमानामभिमन्त्रयते यजमानः ८

पूषासीति वत्समभिदधाति ९

उपसृष्टां मे प्रब्रूतादिति सम्प्रेष्यति १०

उपसृजामीत्यामन्त्रयते । अयक्ष्मा वः प्रजया संसृजामि रायस्पोषेण बहुला भवन्तीरिति वत्समुपसृजति ११

गां चोपसृष्टां विहारं चान्तरेण मा सञ्चारिष्टेति सम्प्रेष्यति १२

यद्युपसृष्टां व्यवेयात्सान्नाय्यं मा विलोपीति ब्रूयात् १३

उपसीदामीत्यामन्त्रयते । अयक्ष्मा वः प्रजया संसृजामि रायस्पोषेण बहुला भवन्तीः । ऊर्जं पयः पिन्वमाना घृतं च जीवन्तीरुप वः सदेयमिति दोग्धोपसीदति १४

न श्रूद्रो दुह्याद्दुह्याद्वा १५

दारुपात्रे दोग्धि १६

उपसृष्टां दुह्यमानां धाराघोषं च यजमानोऽनुमन्त्रयते । अयक्ष्मा वः प्रजया संसृजामीत्युपसृष्टाम् । द्यौश्चेमं यज्ञं पृथिवी च सन्दुहाताम् । धाता सोमेन सह वातेन वायुः । यजमानाय द्रविणं दधात्विति दुह्यमानाम् १७