०८ विधुराग्निसन्धानक्रमः

पृष्टो᳓+++(←पृच्छ्)+++ दिवि᳓, पृष्टो᳓ अग्निः᳓ पृथिव्यां᳓,
पृष्टो᳓ वि᳓श्वा ओ᳓षधीर् आ᳓ विवेश ।
वैश्वानरः᳓ स᳓हसा पृष्टो᳓ अग्निः᳓
स᳓ नो दि᳓वा स᳓ रिषः᳓ पातु न᳓क्तम् ॥

अन्व् अ॒ग्निर् उ॒षसा॒म् अग्र॑म् अख्यत् ।
अन्व् अहा॑नि प्रथ॒मो जा॒तवे॑दाः ।
अनु॒ सूर्य॑स्य पुरु॒त्रा च॑ र॒श्मीन् ।
अनु॒ द्यावा॑-पृथि॒वी आत॑तान ।

त᳓त् सवितु᳓र् व᳓रेण्य᳓+++(णिय)+++म्
भ᳓र्गो+++(=भर्जनम्)+++ देव᳓स्य धीमहि+++(←धा धारणे/ ध्यै ध्याने / धी आराधने)+++ ।
धि᳓यो यो᳓ नः प्रचोद᳓यात् ॥
(परो᳓-रजसे ऽसा᳓वद् ओ᳓३म् ॥)

ताँ स॑वि॒तुर् वरे॑ण्यस्य चि॒त्राम्
आ ऽहव्ँ वृ॑णे सुम॒तिव्ँ वि॒श्व-ज॑न्याम् ।
याम॑स्य॒ कण्वो॒ अदु॑ह॒त् प्रपी॑नाँ
स॒हस्र॑धाराम् पय॑सा म॒हीङ् गाम् ।

वि᳓श्वानि नो दुर्ग᳓हा जातवेदः
सि᳓न्धुं न᳓ नावा᳓ दुरिता᳓ति पर्षि
अ᳓ग्ने अत्रिव᳓न् न᳓मसा गृणानो᳓
अस्मा᳓कम् बोधि अविता᳓ तनू᳓नाम्

पृ॒त॒ना॒जितँ॒ सह॑मानम् उ॒ग्रम्
अ॒ग्निँ हु॑वेम पर॒मात् स॒धस्था॑त्+++(=सहवासाद् [देशात्])+++।
स नः॑ पर्ष॒द्+++(=पारयति)+++ अति॑ दु॒र्गाणि॒ विश्वा॒
क्षाम॑द्+++(=क्षममाणः)+++ दे॒वो अति॑ दुरि॒तात्य् अ॒ग्निः॥

अद्या᳓ नो देव सवितः
प्रजा᳓वत् सावीः सौ᳓भगम् ।
प᳓रा दुष्-ष्व᳓प्न्यं सुव ॥

वि᳓श्वानि देव सवितर्
दुरिता᳓नि प᳓रा सुव
य᳓द् भद्रं᳓ त᳓न् न आ᳓ सुव

अना॑ज्ञातय्ँ॒यदाज्ञा॑तम् ।
य॒ज्ञस्य॑ क्रि॒यते॒ मिथु॑ ।
अग्ने॒ तद॑स्य कल्पय ।
त्वँ हि वेत्थ॑ यथात॒थम् ।

पुरु॑षसम्मितो य॒ज्ञः ।
य॒ज्ञᳶ पुरु॑षसम्मितः ।
अग्ने॒ तद॑स्य कल्पय ।
त्वँ हि वेत्थ॑ यथात॒थम् ।

यत्पा॑क॒त्रा मन॑सा दी॒नद॑क्षा॒ न ।
य॒ज्ञस्य॑ म॒न्वते॒ मर्ता॑सः ।
अ॒ग्निष्टद्धोता॑ क्रतु॒विद्वि॑जा॒नन् ।
यजि॑ष्ठो दे॒वाँ ऋ॑तु॒शो य॑जाति ॥115॥