१९ अश्वचरितहोममन्त्राः

+++(पुरस्तात् स्विष्टकृतः त्र्यशीतिर् अश्वचरितान्य् उपजुहोति)+++
ई॒ङ्का॒राय॒ +++(हेषाय)+++ स्वाहा॑ । ईङ्कृ॑ताय॒ +++(निवृत्तावस्थाय)+++ स्वाहा॑ ।
क्रन्द॑ते॒ स्वाहा॑ । अ॒व॒+++(मुख)+++क्रन्द॑ते॒ स्वाहा॑ ।
+++(नासापुटाभ्यां)+++ प्रोथ॑ते॒ स्वाहा॑ । प्र॒प्रोथ॑ते॒ स्वाहा॑ ।
ग॒न्धाय॒ +++(→गन्धयित्रे)+++ स्वाहा॑ । घ्रा॒ताय॒ स्वाहा॑ ।

प्रा॒णाय॒ स्वाहा॑ । व्या॒नाय॒ स्वाहा॑ । अ॒पा॒नाय॒ स्वाहा॑।

प॒ला॒यिष्यमा॑णाय॒ स्वाहा॑ । पला॑यिताय॒ स्वाहा॑ ।
उ॒प॒रँ॒स्य॒ते स्वाहा॑ । उप॑रताय॒ स्वाहा॑ ।

नि॒वे॒क्ष्य॒ते स्वाहा॑ +++(←शतुरनुम इत्युदात्तो विभक्तौ)+++। नि॒वि॒शमा॑नाय॒ स्वाहा॑ । निवि॑ष्टाय॒ स्वाहा॑ ।
नि॒ष॒त्स्य॒ते स्वाहा॑ । नि॒षीद॑ते॒ स्वाहा॑ । निष॑ण्णाय॒ स्वाहा॑ [49] ।
आ॒सि॒ष्य॒ते स्वाहा॑ । आसी॑नाय॒ स्वाहा॑ । आ॒सि॒ताय॒ स्वाहा॑ ।
+++(शयनादिभ्यो)+++ नि॒प॒त्स्य॒ते स्वाहा॑ । नि॒पद्य॑मानाय॒ स्वाहा॑ । निप॑न्नाय॒ स्वाहा॑ ।
श॒यि॒ष्य॒ते स्वाहा॑ । शया॑नाय॒ स्वाहा॑ । श॒यि॒ताय॒ स्वाहा॑ ।
स॒म्मी॒लि॒ष्य॒ते स्वाहा॑ । स॒म्मील॑ते॒ स्वाहा॑ । सम्मी॑लिताय॒ स्वाहा॑ ।
स्व॒प्स्य॒ते स्वाहा॑ । स्व॒प॒ते स्वाहा॑ । सु॒प्ताय॒ स्वाहा॑ ।
प्र॒भो॒त्स्य॒ते स्वाहा॑ । प्र॒बुध्य॑मानाय॒ स्वाहा॑ । प्रबु॑द्धाय॒ स्वाहा॑ ।
जा॒ग॒रि॒ष्य॒ते स्वाहा॑ । जाग्र॑ते॒ स्वाहा॑ । जा॒ग॒रि॒ताय॒ स्वाहा॑ ।
शुश्रू॑षमाणाय॒ स्वाहा॑ । शृ॒ण्व॒ते स्वाहा॑ । श्रु॒ताय॒ स्वाहा॑ ।
वी॒क्षि॒ष्य॒ते स्वाहा॑ [50] । वीक्ष॑माणाय॒ स्वाहा॑ । वीक्षि॑ताय॒ स्वाहा॑ ।
सँ॒हा॒स्य॒ते +++(→बाह्येन्द्रियाणां स्वैस्स्वैर्विषयैस्संयोगः)+++ स्वाहा॑ । स॒ञ्जिहा॑नाय॒ स्वाहा॑ । उ॒ज्जिहा॑नाय॒ स्वाहा॑ ।
+++(शयनस्थानाद्)+++ वि॒व॒र्त्स्य॒ते स्वाहा॑ । विवर्त॑मानाय॒ स्वाहा॑ । विवृ॑त्ताय॒ स्वाहा॑ ।
उ॒त्था॒स्य॒ते स्वाहा॑ । उ॒त्तिष्ठ॑ते॒ स्वाहा॑ । उत्थि॑ताय॒ स्वाहा॑ ।
+++(देहं)+++ वि॒ध॒वि॒ष्य॒ते+++(=कम्पयते)+++ स्वाहा॑ । वि॒धू॒न्वा॒नाय॒ स्वाहा॑ । विधू॑ताय॒ स्वाहा॑ ।
उ॒त्क्रँ॒ं॒स्य॒ते स्वाहा॑ । उ॒त्क्राम॑ते॒ स्वाहा॑ । उत्क्रा॑न्ताय॒ स्वाहा॑ ।
च॒ङ्क्र॒मि॒ष्य॒ते स्वाहा॑ । च॒ङ्क्र॒म्यमा॑णाय॒ स्वाहा॑ । च॒ङ्क्र॒मिताय॒ स्वाहा॑ ।
क॒ण्डू॒यि॒ष्य॒ते स्वाहा॑ । क॒ण्डू॒यमा॑नाय॒ स्वाहा॑ । क॒ण्डू॒यि॒ताय॒ स्वाहा॑ ।
+++(काष्ठादिषु शरीरस्य)+++ नि॒क॒षि॒ष्य॒ते स्वाहा॑ । नि॒कष॑माणाय॒ स्वाहा॑ । निक॑षिताय॒ स्वाहा॑ । यदत्ति॒ तस्मै॒ स्वाहा॑ । यत्पिब॑ति॒ तस्मै॒ स्वाहा॑ ।
यन्मेह॑ति॒ तस्मै॒ स्वाहा॑ । यच्छकृ॑त् क॒रोति॒ तस्मै॒ स्वाहा॑ ।
रेत॑से॒ स्वाहा॑ । प्र॒जाभ्य॒स् स्वाहा॑ । प्र॒जन॑नाय॒ स्वाहा॑ ।
सर्व॑स्मै॒ स्वाहा॑ ॥ [51]