४

र॒श्मिर॑सि॒ क्षया॑य त्वा॒ क्षय॑ञ्जिन्व॒ प्रेति॑रसि॒ धर्मा॑य त्वा॒ धर्म॑ञ्जि॒न्वान्वि॑तिरसि दि॒वे त्वा॒ दिव॑ञ्जिन्व स॒न्धिर॑स्य॒न्तरि॑क्षाय त्वा॒न्तरि॑क्षञ्जिन्व प्रति॒धिर॑सि पृथि॒व्यै त्वा॑ पृथि॒वीञ्जि॑न्व विष्ट॒म्भो॑ऽसि॒ वृष्ट्यै॑ त्वा॒ वृष्टि॑ञ्जिन्व प्र॒वास्यह्ने॒ त्वाह॑र्जिन्वानु॒वासि॒ रात्रि॑यै त्वा॒ रात्रि॑ञ्जिन्वो॒शिग॑सि [1]
वसु॑भ्यस्त्वा॒ वसू॑ञ्जिन्व प्रके॒तो॑ऽसि रु॒द्रेभ्य॑स्त्वा रु॒द्राञ्जि॑न्व सुदी॒तिर॑स्यादि॒त्येभ्य॑स्त्वाऽऽदि॒त्याञ्जि॒न्वौजो॑ऽसि पि॒तृभ्य॑स्त्वा पि॒तॄञ्जि॑न्व॒ तन्तु॑रसि प्र॒जाभ्य॑स्त्वा प्र॒जा जि॑न्व पृतना॒षाड॑सि प॒शुभ्य॑स्त्वा प॒शूञ्जि॑न्व रे॒वद॒स्योष॑धीभ्य॒स्त्वौष॑धीर्जिन्वाभि॒जिद॑सि यु॒क्तग्रा॒वेन्द्रा॑य॒ त्वेन्द्र॑ञ्जि॒न्वाधि॑पतिरसि प्रा॒णाय॑ [2]
त्वा॒ प्रा॒णञ्जि॑न्व य॒न्तास्य॑पा॒नाय॑ त्वापा॒नञ्जि॑न्व सँ॒सर्पो॑ऽसि॒ चक्षु॑षे त्वा॒ चक्षु॑र्जिन्व वयो॒धा अ॑सि॒ श्रोत्रा॑य त्वा॒ श्रोत्र॑ञ्जिन्व त्रि॒वृद॑सि प्र॒वृद॑सि सव्ँ॒वृद॑सि वि॒वृद॑सि सँरो॒हो॑ऽसि नीरो॒हो॑ऽसि प्ररो॒हो॑ऽस्यनुरो॒हो॑ऽसि वसु॒को॑ऽसि॒ वेष॑श्रिरसि॒ वस्य॑ष्टिरसि ॥ [3]
राज्ञ्य॑सि॒ प्राची॒ दिग्वस॑वस्ते दे॒वा अधि॑पतयो॒ऽग्निर्हे॑ती॒नाम्प्र॑तिध॒र्ता त्रि॒वृत्त्वा॒ स्तोमᳶ॑ पृथि॒व्याँ श्र॑य॒त्वाज्य॑मु॒क्थमव्य॑थयत्स्तभ्नातु रथन्त॒रँ साम॒ प्रति॑ष्ठित्यै वि॒राड॑सि दक्षि॒णा दिग्रु॒द्रास्ते॑ दे॒वा अधि॑पतय॒ इन्द्रो॑ हेती॒नाम्प्र॑तिध॒र्ता प॑ञ्चद॒शस्त्वा॒ स्तोमᳶ॑ पृथि॒व्याँ श्र॑यतु॒ प्रउ॑गमु॒क्थमव्य॑थयत्स्तभ्नातु बृ॒हत्साम॒ प्रति॑ष्ठित्यै स॒म्राड॑सि प्र॒तीची॒ दिक् [4]
आ॒दि॒त्यास्ते॑ दे॒वा अधि॑पतय॒स्सोमो॑ हेती॒नाम्प्र॑तिध॒र्ता स॑प्तद॒शस्त्वा॒ स्तोमᳶ॑ पृथि॒व्याँ श्र॑यतु मरुत्व॒तीय॑मु॒क्थमव्य॑थयत्स्तभ्नातु वैरू॒पँ साम॒ प्रति॑ष्ठित्यै स्व॒राड॒स्युदी॑ची॒ दिग्विश्वे॑ ते दे॒वा अधि॑पतयो॒ वरु॑णो हेती॒नाम्प्र॑तिध॒र्तैक॑विँ॒शस्त्वा॒ स्तोमᳶ॑ पृथि॒व्याँ श्र॑यतु॒ निष्के॑वल्यमु॒क्थमव्य॑थयत्स्तभ्नातु वैरा॒जँ साम॒ प्रति॑ष्ठित्या॒ अधि॑पत्न्यसि बृह॒ती दिङ्म॒रुत॑स्ते दे॒वा अधि॑पतयः [5]
बृह॒स्पति॑र्हेती॒नाम्प्र॑तिध॒र्ता त्रि॑णवत्रयस्त्रिँ॒शौ त्वा॒ स्तोमौ॑ पृथि॒व्याँ श्र॑यताव्ँ वैश्वदेवाग्निमारु॒ते उ॒क्थे अव्य॑थयन्ती स्तभ्नीताँ शाक्वररैव॒ते साम॑नी॒ प्रति॑ष्ठित्या अ॒न्तरि॑क्षा॒यर्ष॑यस्त्वा प्रथम॒जा दे॒वेषु॑ दि॒वो मात्र॑या वरि॒णा प्र॑थन्तु विध॒र्ता चा॒यमधि॑पतिश्च॒ ते त्वा॒ सर्वे॑ सव्ँविदा॒ना नाक॑स्य पृ॒ष्ठे सु॑व॒र्गे लो॒के यज॑मानञ्च सादयन्तु ॥ [6]
अ॒यम्पु॒रो हरि॑केश॒स्सूर्य॑रश्मि॒स्तस्य॑ रथगृ॒त्सश्च॒ रथौ॑जाश्च सेनानिग्राम॒ण्यौ॑ पुञ्जिकस्थ॒ला च॑ कृतस्थ॒ला चा॑प्स॒रसौ॑ यातु॒धाना॑ हे॒ती रक्षाँ॑सि॒ प्रहे॑तिर॒यन्द॑क्षि॒णा वि॒श्वक॑र्मा॒ तस्य॑ रथस्व॒नश्च॒ रथे॑चित्रश्च सेनानिग्राम॒ण्यौ॑ मेन॒का च॑ सहज॒न्या चा॑प्स॒रसौ॑ द॒ङ्क्ष्णवᳶ॑ प॒शवो॑ हे॒तिᳶ पौरु॑षेयो व॒धᳶ प्रहे॑तिर॒यम्प॒श्चाद्वि॒श्वव्य॑चा॒स्तस्य॒ रथ॑प्रोत॒श्चास॑मरथश्च सेनानिग्राम॒ण्यौ॑ प्र॒म्लोच॑न्ती च [7]
अ॒नु॒म्लोच॑न्ती चाप्स॒रसौ॑ स॒र्पा हे॒तिर्व्या॒घ्राᳶ प्रहे॑तिर॒यमु॑त्त॒रात्सय्ँ॒यद्व॑सु॒स्तस्य॑ सेन॒जिच्च॑ सु॒षेण॑श्च सेनानिग्राम॒ण्यौ॑ वि॒श्वाची॑ च घृ॒ताची॑ चाप्स॒रसा॒वापो॑ हे॒तिर्वात॒ᳶ प्रहे॑तिर॒यमु॒पर्य॒र्वाग्व॑सु॒स्तस्य॒ तार्क्ष्य॒श्चारि॑ष्टनेमिश्च सेनानिग्राम॒ण्या॑वु॒र्वशी॑ च पू॒र्वचि॑त्तिश्चाप्स॒रसौ॑ वि॒द्युद्धे॒तिर॑व॒स्फूर्ज॒न्प्रहे॑ति॒स्तेभ्यो॒ नम॒स्ते नो॑ मृडयन्तु॒ ते यम् [8]
द्वि॒ष्मो यश्च॑ नो॒ द्वेष्टि॒ तव्ँवो॒ जम्भे॑ दधाम्या॒योस्त्वा॒ सद॑ने सादया॒म्यव॑तश्छा॒याया॒न्नम॑स्समु॒द्राय॒ नम॑स्समु॒द्रस्य॒ चक्ष॑से परमे॒ष्ठी त्वा॑ सादयतु दि॒वᳶ पृ॒ष्ठे व्यच॑स्वती॒म्प्रथ॑स्वतीव्ँवि॒भूम॑तीम्प्र॒भूम॑तीम्परि॒भूम॑ती॒न्दिवय्ँ॑यच्छ॒ दिव॑न्दृँह॒ दिव॒म्मा हिँ॑सी॒र्विश्व॑स्मै प्रा॒णाया॑पा॒नाय॑ व्या॒नायो॑दा॒नाय॑ प्रति॒ष्ठायै॑ च॒रित्रा॑य॒ सूर्य॑स्त्वा॒भि पा॑तु म॒ह्या स्व॒स्त्या छ॒र्दिषा॒ शन्त॑मेन॒ तया॑ दे॒वत॑याङ्गिर॒स्वद्ध्रु॒वा सी॑द । प्रोथ॒दश्वो॒ न यव॑से अवि॒ष्यन्‌य॒दा म॒हस्सव्ँ॒वर॑णा॒द्व्यस्था॑त् । आद॑स्य॒ वातो॒ अनु॑ वाति शो॒चिरध॑ स्म ते॒ व्रज॑नङ्कृ॒ष्णम॑स्ति ॥ [9]
अ॒ग्निर्मू॒र्धा दि॒वᳵ क॒कुत्पतिᳶ॑ पृथि॒व्या अ॒यम् । अ॒पाँ रेताँ॑सि जिन्वति ॥ त्वाम॑ग्ने॒ पुष्क॑रा॒दध्यथ॑र्वा॒ निर॑मन्थत । मू॒र्ध्नो विश्व॑स्य वा॒घतः॑ ॥ अ॒यम॒ग्निस्स॑ह॒स्रिणो॒ वाज॑स्य श॒तिन॒स्पतिः॑ । मू॒र्धा क॒वी र॑यी॒णाम् ॥ भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भि॒स्सच॑से शि॒वाभिः॑ । दि॒वि मू॒र्धान॑न्दधिषे सुव॒र्षाञ्जि॒ह्वाम॑ग्ने चकृषे हव्य॒वाह॑म् ॥ अबो॑ध्य॒ग्निस्स॒मिधा॒ जना॑नाम् [10]
प्रति॑ धे॒नुमि॑वाय॒तीमु॒षास॑म् । य॒ह्वा इ॑व॒ प्र व॒यामु॒ज्जिहा॑ना॒ᳶ प्र भा॒नव॑स्सिस्रते॒ नाक॒मच्छ॑ । अवो॑चाम क॒वये॒ मेध्या॑य॒ वचो॑ व॒न्दारु॑ वृष॒भाय॒ वृष्णे॑ । गवि॑ष्ठिरो॒ नम॑सा॒ स्तोम॑म॒ग्नौ दि॒वीव॑ रु॒क्ममु॒र्व्यञ्च॑मश्रेत् । जन॑स्य गो॒पा अ॑जनिष्ट॒ जागृ॑विर॒ग्निस्सु॒दक्ष॑स्सुवि॒ताय॒ नव्य॑से । घृ॒तप्र॑तीको बृह॒ता दि॑वि॒स्पृशा॑ द्यु॒मद्वि भा॑ति भर॒तेभ्य॒श्शुचिः॑ । त्वाम॑ग्ने॒ अङ्गि॑रसः [11]
गुहा॑ हि॒तमन्व॑विन्दञ्छिश्रिया॒णव्ँवने॑वने । स जा॑यसे म॒थ्यमा॑न॒स्सहो॑ म॒हत्त्वामा॑हु॒स्सह॑सस्पु॒त्रम॑ङ्गिरः । य॒ज्ञस्य॑ के॒तुम्प्र॑थ॒मम्पु॒रोहि॑तम॒ग्निन्नर॑स्त्रिषध॒स्थे समि॑न्धते । इन्द्रे॑ण दे॒वैस्स॒रथँ॒ स ब॒र्हिषि॒ सीद॒न्नि होता॑ य॒जथा॑य सु॒क्रतुः॑ । त्वाञ्चि॑त्रश्रवस्तम॒ हव॑न्ते वि॒क्षु ज॒न्तवः॑ । शो॒चिष्के॑शम्पुरुप्रि॒याग्ने॑ ह॒व्याय॒ वोढ॑वे । सखा॑य॒स्सव्ँव॑स्स॒म्यञ्च॒मिष॑म् [12]
स्तोम॑ञ्चा॒ग्नये॑ । वर्षि॑ष्ठाय क्षिती॒नामू॒र्जो नप्त्रे॒ सह॑स्वते । सँस॒मिद्यु॑वसे वृष॒न्नग्ने॒ विश्वा॑न्य॒र्य आ । इ॒डस्प॒दे समि॑ध्यसे॒ स नो॒ वसू॒न्या भ॑र । ए॒ना वो॑ अ॒ग्निन्नम॑सो॒र्जो नपा॑त॒मा हु॑वे । प्रि॒यञ्चेति॑ष्ठमर॒तिँ स्व॑ध्व॒रव्ँविश्व॑स्य दू॒तम॒मृत॑म् । स यो॑जते अरु॒षो वि॒श्वभो॑जसा॒ स दु॑द्रव॒त्स्वा॑हुतः । सु॒ब्रह्मा॑ य॒ज्ञस्सु॒शमी॑ [13]
वसू॑नान्दे॒वँ राधो॒ जना॑नाम् । उद॑स्य शो॒चिर॑स्थादा॒जुह्वा॑नस्य मी॒ढुषः॑ । उद्धू॒मासो॑ अरु॒षासो॑ दिवि॒स्पृश॒स्सम॒ग्निमि॑न्धते॒ नरः॑ । अग्ने॒ वाज॑स्य॒ गोम॑त॒ ईशा॑नस्सहसो यहो । अ॒स्मे धे॑हि जातवेदो॒ महि॒ श्रवः॑ । स इ॑धा॒नो वसु॑ष्क॒विर॒ग्निरी॒डेन्यो॑ गि॒रा । रे॒वद॒स्मभ्य॑म्पुर्वणीक दीदिहि । क्ष॒पो रा॑जन्नु॒त त्मनाग्ने॒ वस्तो॑रु॒तोषसः॑ । स ति॑ग्मजम्भ [14]
र॒क्षसो॑ दह॒ प्रति॑ । आ ते॑ अग्न इधीमहि द्यु॒मन्त॑न्देवा॒जर॑म् । यद्ध॒ स्या ते॒ पनी॑यसी स॒मिद्दी॒दय॑ति॒ द्यवीषँ॑ स्तो॒तृभ्य॒ आ भ॑र । आ ते॑ अग्न ऋ॒चा ह॒विश्शु॒क्रस्य॑ ज्योतिषस्पते । सुश्च॑न्द्र॒ दस्म॒ विश्प॑ते॒ हव्य॑वा॒ट्तुभ्यँ॑ हूयत॒ इषँ॑ स्तो॒तृभ्य॒ आ भ॑र । उ॒भे सु॑श्चन्द्र स॒र्पिषो॒ दर्वी॑ श्रीणीष आ॒सनि॑ । उ॒तो न॒ उत्पु॑पूर्याः [15]
उ॒क्थेषु॑ शवसस्पत॒ इषँ॑ स्तो॒तृभ्य॒ आ भ॑र । अग्ने॒ तम॒द्याश्व॒न्न स्तोमै॒ᳵ क्रतु॒न्न भ॒द्रँ हृ॑दि॒स्पृश॑म् । ऋ॒ध्यामा॑ त॒ ओहैः॑ । अधा॒ ह्य॑ग्ने॒ क्रतो॑र्भ॒द्रस्य॒ दक्ष॑स्य सा॒धोः । र॒थीर्ऋ॒तस्य॑ बृह॒तो ब॒भूथ॑ । आ॒भिष्टे॑ अ॒द्य गी॒र्भिर्गृ॒णन्तोऽग्ने॒ दाशे॑म । प्र ते॑ दि॒वो न स्त॑नयन्ति॒ शुष्माः॑ । ए॒भिर्नो॑ अ॒र्कैर्भवा॑ नो अ॒र्वाङ् [16]
सुव॒र्न ज्योतिः॑ । अग्ने॒ विश्वे॑भिस्सु॒मना॒ अनी॑कैः । अ॒ग्निँ होता॑रम्मन्ये॒ दास्व॑न्तव्ँ॒वसोः॑ सू॒नुँ सह॑सो जा॒तवे॑दसम् । विप्र॒न्न जा॒तवे॑दसम् । य ऊ॒र्ध्वया॑ स्वध्व॒रो दे॒वो दे॒वाच्या॑ कृ॒पा । घृ॒तस्य॒ विभ्रा॑ष्टि॒मनु॑ शु॒क्रशो॑चिष आ॒जुह्वा॑नस्य स॒र्पिषः॑ । अग्ने॒ त्वन्नो॒ अन्त॑मः । उ॒त त्रा॒ता शि॒वो भ॑व वरू॒थ्यः॑ । तन्त्वा॑ शोचिष्ठ दीदिवः । सु॒म्नाय॑ नू॒नमी॑महे॒ सखि॑भ्यः । वसु॑र॒ग्निर्वसु॑श्रवाः । अच्छा॑ नक्षि द्यु॒मत्त॑मो र॒यिन्दाः॑ ॥ [17]
इ॒न्द्रा॒ग्निभ्या॑न्त्वा स॒युजा॑ यु॒जा यु॑नज्म्याघा॒राभ्या॒न्तेज॑सा॒ वर्च॑सो॒क्थेभि॒स्स्तोमे॑भि॒श्छन्दो॑भी र॒य्यै पोषा॑य सजा॒ताना॑म्मध्यम॒स्थेया॑य॒ मया॑ त्वा स॒युजा॑ यु॒जा यु॑नज्म्य॒म्बा दु॒ला नि॑त॒त्निर॒भ्रय॑न्ती मे॒घय॑न्ती व॒र्षय॑न्ती चुपु॒णीका॒ नामा॑सि प्र॒जाप॑तिना त्वा॒ विश्वा॑भिर्धी॒भिरुप॑ दधामि पृथि॒व्यु॑दपु॒रमन्ने॑न वि॒ष्टा म॑नु॒ष्या॑स्ते गो॒प्तारो॒ऽग्निर्विय॑त्तोऽस्या॒न्ताम॒हम्प्र प॑द्ये॒ सा [18]
मे॒ शर्म॑ च॒ वर्म॑ चा॒स्त्वधि॑द्यौर॒न्तरि॑क्ष॒म्ब्रह्म॑णा वि॒ष्टा म॒रुत॑स्ते गो॒प्तारो॑ वा॒युर्विय॑त्तोऽस्या॒न्ताम॒हम्प्र प॑द्ये॒ सा मे॒ शर्म॑ च॒ वर्म॑ चास्तु॒ द्यौरप॑राजिता॒मृते॑न वि॒ष्टादि॒त्यास्ते॑ गो॒प्तार॒स्सूर्यो॒ विय॑त्तोऽस्या॒न्ताम॒हम्प्र प॑द्ये॒ सा मे॒ शर्म॑ च॒ वर्म॑ चास्तु ॥ [19]
बृह॒स्पति॑स्त्वा सादयतु पृथि॒व्याᳶ पृ॒ष्ठे ज्योति॑ष्मतीव्ँ॒विश्व॑स्मै प्रा॒णाया॑पा॒नाय॒ विश्व॒ञ्ज्योति॑र्यच्छा॒ग्निस्तेऽधि॑पतिर्वि॒श्वक॑र्मा त्वा सादयत्व॒न्तरि॑क्षस्य पृ॒ष्ठे ज्योति॑ष्मतीव्ँ॒विश्व॑स्मै प्रा॒णाया॑पा॒नाय॒ विश्व॒ञ्ज्योति॑र्यच्छ वा॒युस्तेऽधि॑पतिᳶ प्र॒जाप॑तिस्त्वा सादयतु दि॒वᳶ पृ॒ष्ठे ज्योति॑ष्मतीव्ँ॒विश्व॑स्मै प्रा॒णाया॑पा॒नाय॒ विश्व॒ञ्ज्योति॑र्यच्छ परमे॒ष्ठी तेऽधि॑पतिᳶ पुरोवात॒सनि॑रस्यभ्र॒सनि॑रसि विद्यु॒त्सनिः॑ [20]
अ॒सि॒ स्त॒न॒यि॒त्नु॒सनि॑रसि वृष्टि॒सनि॑रस्य॒ग्नेर्यान्य॑सि दे॒वाना॑मग्ने॒यान्य॑सि वा॒योर्यान्य॑सि दे॒वानाव्ँ॑वायो॒यान्य॑स्य॒न्तरि॑क्षस्य॒ यान्य॑सि दे॒वाना॑मन्तरिक्ष॒यान्य॑स्य॒न्तरि॑क्षमस्य॒न्तरि॑क्षाय त्वा सलि॒लाय॑ त्वा॒ सर्णी॑काय त्वा॒ सती॑काय त्वा॒ केता॑य त्वा॒ प्रचे॑तसे त्वा॒ विव॑स्वते त्वा दि॒वस्त्वा॒ ज्योति॑ष आदि॒त्येभ्य॑स्त्व॒र्चे त्वा॑ रु॒चे त्वा॑ द्यु॒ते त्वा॑ भा॒से त्वा॒ ज्योति॑षे त्वा यशो॒दान्त्वा॒ यश॑सि तेजो॒दान्त्वा॒ तेज॑सि पयो॒दान्त्वा॒ पय॑सि वर्चो॒दान्त्वा॒ वर्च॑सि द्रविणो॒दान्त्वा॒ द्रवि॑णे सादयामि॒ तेनर्षि॑णा॒ तेन॒ ब्रह्म॑णा॒ तया॑ दे॒वत॑याङ्गिर॒स्वद्ध्रु॒वा सी॑द ॥ [21]
भू॒य॒स्कृद॑सि वरिव॒स्कृद॑सि॒ प्राच्य॑स्यू॒र्ध्वास्य॑न्तरिक्ष॒सद॑स्य॒न्तरि॑क्षे सीदाप्सु॒षद॑सि श्येन॒सद॑सि गृध्र॒सद॑सि सुपर्ण॒सद॑सि नाक॒सद॑सि पृथि॒व्यास्त्वा॒ द्रवि॑णे सादयाम्य॒न्तरि॑क्षस्य त्वा॒ द्रवि॑णे सादयामि दि॒वस्त्वा॒ द्रवि॑णे सादयामि दि॒शान्त्वा॒ द्रवि॑णे सादयामि द्रविणो॒दान्त्वा॒ द्रवि॑णे सादयामि प्रा॒णम्मे॑ पाह्यपा॒नम्मे॑ पाहि व्या॒नम्मे॑ [22]
पा॒ह्यायु॑र्मे पाहि वि॒श्वायु॑र्मे पाहि स॒र्वायु॑र्मे पा॒ह्यग्ने॒ यत्ते॒ परँ॒ हृन्नाम॒ तावेहि॒ सँ र॑भावहै॒ पाञ्च॑जन्ये॒ष्वप्ये॑ध्यग्ने॒ यावा॒ अया॑वा॒ एवा॒ ऊमा॒स्सब्द॒स्सग॑रस्सु॒मेकः॑ ॥ [23]
अ॒ग्निना॑ विश्वा॒षाट्त्सूर्ये॑ण स्व॒राट्क्रत्वा॒ शची॒पति॑र्ऋष॒भेण॒ त्वष्टा॑ य॒ज्ञेन॑ म॒घवा॒न्दक्षि॑णया सुव॒र्गो म॒न्युना॑ वृत्र॒हा सौहा॑र्द्येन तनू॒धा अन्ने॑न॒ गयᳶ॑ पृथि॒व्यास॑नोदृ॒ग्भिर॑न्ना॒दो व॑षट्का॒रेण॒र्द्धस्साम्ना॑ तनू॒पा वि॒राजा॒ ज्योति॑ष्मा॒न्ब्रह्म॑णा सोम॒पा गोभि॑र्य॒ज्ञन्दा॑धार क्ष॒त्रेण॑ मनु॒ष्या॑नश्वे॑न च॒ रथे॑न च व॒ज्र्यृ॑तुभिᳶ॑ प्र॒भुस्सव्ँ॑वत्स॒रेण॑ परि॒भूस्तप॒साना॑धृष्ट॒स्सूर्य॒स्सन्त॒नूभिः॑ ॥ [24]
प्र॒जाप॑ति॒र्मन॒सान्धोऽच्छे॑तो धा॒ता दी॒क्षायाँ॑ सवि॒ता भृ॒त्याम्पू॒षा सो॑म॒क्रय॑ण्याव्ँ॒वरु॑ण॒ उप॑न॒द्धोऽसु॑रᳵ क्री॒यमा॑णो मि॒त्रᳵ क्री॒तश्शि॑पिवि॒ष्ट आसा॑दितो न॒रन्धि॑षᳶ प्रो॒ह्यमा॒णोऽधि॑पति॒राग॑तᳶ प्र॒जाप॑तिᳶ प्रणी॒यमा॑नो॒ऽग्निराग्नी॑ध्रे॒ बृह॒स्पति॒राग्नी॑ध्रात्प्रणी॒यमा॑न॒ इन्द्रो॑ हवि॒र्धानेऽदि॑ति॒रासा॑दितो॒ विष्णु॑रुपावह्रि॒यमा॒णोऽथ॒र्वोपो॑त्तो य॒मो॑ऽभिषु॑तोऽपूत॒पा आ॑धू॒यमा॑नो वा॒युᳶ पू॒यमा॑नो मि॒त्रः क्षी॑र॒श्रीर्म॒न्थी स॑क्तु॒श्रीर्वै॑श्वदे॒व उन्नी॑तो रुद्र॒ आहु॑तो वा॒युरावृ॑त्तो नृ॒चक्षा॒ᳶ प्रति॑ख्यातो भ॒क्ष आग॑तᳶ पितृ॒णान्ना॑राशँ॒सोऽसु॒रात्त॒स्सिन्धु॑रवभृ॒थम॑वप्र॒यन्त्स॑मु॒द्रोऽव॑गतस्सलि॒लᳶ प्रप्लु॑तस्सुव॑रु॒दृच॑ङ्ग॒तः ॥ [25]
कृत्ति॑का॒ नक्ष॑त्रम॒ग्निर्दे॒वता॒ग्ने रुच॑स्स्थ प्र॒जाप॑तेर्धा॒तुस्सोम॑स्य॒र्चे त्वा॑ रु॒चे त्वा॑ द्यु॒ते त्वा॑ भा॒से त्वा॒ ज्योति॑षे त्वा रोहि॒णी नक्ष॑त्रम्प्र॒जाप॑तिर्दे॒वता॑ मृगशी॒र्षन्नक्ष॑त्रँ॒ सोमो॑ दे॒वता॒र्द्रा नक्ष॑त्रँ रु॒द्रो दे॒वता॒ पुन॑र्वसू॒ नक्ष॑त्र॒मदि॑तिर्दे॒वता॑ ति॒ष्यो॑ नक्ष॑त्र॒म्बृह॒स्पति॑र्दे॒वता॑श्रे॒षा नक्ष॑त्रँ स॒र्पा दे॒वता॑ म॒घा नक्ष॑त्रम्पि॒तरो॑ दे॒वता॒ फल्गु॑नी॒ नक्ष॑त्रम् [26]
अ॒र्य॒मा दे॒वता॒ फल्गु॑नी॒ नक्ष॑त्र॒म्भगो॑ दे॒वता॒ हस्तो॒ नक्ष॑त्रँ सवि॒ता दे॒वता॑ चि॒त्रा नक्ष॑त्र॒मिन्द्रो॑ दे॒वता॑ स्वा॒ती नक्ष॑त्रव्ँवा॒युर्दे॒वता॒ विशा॑खे॒ नक्ष॑त्रमिन्द्रा॒ग्नी दे॒वता॑ऽनूरा॒धा नक्ष॑त्रम्मि॒त्रो दे॒वता॑ रोहि॒णी नक्ष॑त्र॒मिन्द्रो॑ दे॒वता॑ वि॒चृतौ॒ नक्ष॑त्रम्पि॒तरो॑ दे॒वता॑षा॒ढा नक्ष॑त्र॒मापो॑ दे॒वता॑षा॒ढा नक्ष॑त्रव्ँ॒विश्वे॑ दे॒वा दे॒वता॑ श्रो॒णा नक्ष॑त्त्रव्ँ॒विष्णु॑र्दे॒वता॒ श्रवि॑ष्ठा॒ नक्ष॑त्रव्ँ॒वस॑वः [27]
दे॒वता॑ श॒तभि॑ष॒ङ्नक्ष॑त्र॒मिन्द्रो॑ दे॒वता॑ प्रोष्ठप॒दा नक्ष॑त्रम॒ज एक॑पाद्दे॒वता॑ प्रोष्ठप॒दा नक्ष॑त्र॒महि॑र्बु॒ध्नियो॑ दे॒वता॑ रे॒वती॒ नक्ष॑त्रम्पू॒षा दे॒वता॑श्व॒युजौ॒ नक्ष॑त्रम॒श्विनौ॑ दे॒वता॑प॒भर॑णी॒र्नक्ष॑त्रय्ँय॒मो दे॒वता॑ पू॒र्णा प॒श्चाद्यत्ते॑ दे॒वा अद॑धुः ॥ [28]
मधु॑श्च॒ माध॑वश्च॒ वास॑न्तिकावृ॒तू शु॒क्रश्च॒ शुचि॑श्च॒ ग्रैष्मा॑वृ॒तू नभ॑श्च नभ॒स्य॑श्च॒ वार्षि॑कावृ॒तू इ॒षश्चो॒र्जश्च॑ शार॒दावृ॒तू सह॑श्च सह॒स्य॑श्च॒ हैम॑न्तिकावृ॒तू तप॑श्च तप॒स्य॑श्च शैशि॒रावृ॒तू अ॒ग्नेर॑न्तश्श्ले॒षो॑ऽसि॒ कल्पे॑ता॒न्द्यावा॑पृथि॒वी कल्प॑न्ता॒माप॒ ओष॑धी॒ᳵ कल्प॑न्ताम॒ग्नय॒ᳶ पृथ॒ङ्मम॒ ज्यैष्ठ्या॑य॒ सव्र॑ताः [29]
ये॑ऽग्नय॒स्सम॑नसोऽन्त॒रा द्यावा॑पृथि॒वी शै॑शि॒रावृ॒तू अ॒भि कल्प॑माना॒ इन्द्र॑मिव दे॒वा अ॒भि सव्ँवि॑शन्तु सय्ँ॒यच्च॒ प्रचे॑ताश्चा॒ग्नेस्सोम॑स्य॒ सूर्य॑स्यो॒ग्रा च॑ भी॒मा च॑ पितृ॒णाय्ँय॒मस्येन्द्र॑स्य ध्रु॒वा च॑ पृथि॒वी च॑ दे॒वस्य॑ सवि॒तुर्म॒रुताव्ँ॒वरु॑णस्य ध॒र्त्री च॒ धरि॑त्री च मि॒त्रावरु॑णयोर्मि॒त्रस्य॑ धा॒तुᳶ प्राची॑ च प्र॒तीची॑ च॒ वसू॑नाँ रु॒द्राणा॑म् [30]
आ॒दि॒त्याना॒न्ते तेऽधि॑पतय॒स्तेभ्यो॒ नम॒स्ते नो॑ मृडयन्तु॒ ते यन्द्वि॒ष्मो यश्च॑ नो॒ द्वेष्टि॒ तव्ँवो॒ जम्भे॑ दधामि स॒हस्र॑स्य प्र॒मा अ॑सि स॒हस्र॑स्य प्रति॒मा अ॑सि स॒हस्र॑स्य वि॒मा अ॑सि स॒हस्र॑स्यो॒न्मा अ॑सि साह॒स्रो॑ऽसि स॒हस्रा॑य त्वे॒मा मे॑ अग्न॒ इष्ट॑का धे॒नव॑स्स॒न्त्वेका॑ च श॒तञ्च॑ स॒हस्र॑ञ्चा॒युत॑ञ्च [31]
नि॒युत॑ञ्च प्र॒युत॒ञ्चार्बु॑दञ्च॒ न्य॑र्बुदञ्च समु॒द्रश्च॒ मध्य॒ञ्चान्त॑श्च परा॒र्धश्चे॒मा मे॑ अग्न॒ इष्ट॑का धे॒नव॑स्सन्तु ष॒ष्टिस्स॒हस्र॑म॒युत॒मक्षी॑यमाणा ऋत॒स्थास्स्थ॑र्ता॒वृधो॑ घृत॒श्चुतो॑ मधु॒श्चुत॒ ऊर्ज॑स्वतीस्स्वधा॒विनी॒स्ता मे॑ अग्न॒ इष्ट॑का धे॒नव॑स्सन्तु वि॒राजो॒ नाम॑ काम॒दुघा॑ अ॒मुत्रा॒मुष्मिल्ँ॑ लो॒के ॥ [32]
स॒मिद्दि॒शामा॒शया॑ नस्सुव॒र्विन्मधो॒रतो॒ माध॑वᳶ पात्व॒स्मान् । अ॒ग्निर्दे॒वो दु॒ष्टरी॑तु॒रदा॑भ्य इ॒दङ्क्ष॒त्रँ र॑क्षतु॒ पात्व॒स्मान् । र॒थ॒न्त॒रँ साम॑भिᳶ पात्व॒स्मान्गा॑य॒त्री छन्द॑साव्ँवि॒श्वरू॑पा । त्रि॒वृन्नो॑ वि॒ष्ठया॒ स्तोमो॒ अह्नाँ॑ समु॒द्रो वात॑ इ॒दमोजᳶ॑ पिपर्तु । उ॒ग्रा दि॒शाम॒भिभू॑तिर्वयो॒धाश्शुचि॑श्शु॒क्रे अह॑न्योज॒सीना॑ । इन्द्राधि॑पतिᳶ पिपृता॒दतो॑ नो॒ महि॑ [33]
क्ष॒त्रव्ँवि॒श्वतो॑ धारये॒दम् । बृ॒हत्साम॑ क्षत्र॒भृद्वृ॒द्धवृ॑ष्णियन्त्रि॒ष्टुभौज॑श्शुभि॒तमु॒ग्रवी॑रम् । इन्द्र॒ स्तोमे॑न पञ्चद॒शेन॒ मध्य॑मि॒दव्ँवाते॑न॒ सग॑रेण रक्ष । प्राची॑ दि॒शाँ स॒हय॑शा॒ यश॑स्वती॒ विश्वे॑ देवाᳶ प्रा॒वृषाह्नाँ॒ सुव॑र्वती । इ॒दङ्क्ष॒त्रन्दु॒ष्टर॑म॒स्त्वोजोऽना॑धृष्टँ सह॒स्रियँ॒ सह॑स्वत् । वै॒रू॒पे साम॑न्नि॒ह तच्छ॑केम॒ जग॑त्यैनव्ँवि॒क्ष्वा वे॑शयामः । विश्वे॑ देवास्सप्तद॒शेन॑ [34]
वर्च॑ इ॒दङ्क्ष॒त्रँ स॑लि॒लवा॑तमु॒ग्रम् । ध॒र्त्री दि॒शाङ्क्ष॒त्रमि॒दन्दा॑धारोप॒स्थाशा॑नाम्मि॒त्रव॑द॒स्त्वोजः॑ । मित्रा॑वरुणा श॒रदाह्ना॑ञ्चिकित्नू अ॒स्मै रा॒ष्ट्राय॒ महि॒ शर्म॑ यच्छतम् । वै॒रा॒जे साम॒न्नधि॑ मे मनी॒षानु॒ष्टुभा॒ सम्भृ॑तव्ँवी॒र्यँ॑ सहः॑ । इ॒दङ्क्ष॒त्रम्मि॒त्रव॑दा॒र्द्रदा॑नु॒ मित्रा॑वरुणा॒ रक्ष॑त॒माधि॑पत्यैः । स॒म्राड्दि॒शाँ स॒हसा॑म्नी॒ सह॑स्वत्यृ॒तुर्हे॑म॒न्तो वि॒ष्ठया॑ नᳶ पिपर्तु । अ॒व॒स्युवा॑ताः [35]
बृ॒ह॒तीर्नु शक्व॑रीरि॒मय्ँ य॒ज्ञम॑वन्तु नो घृ॒ताचीः॑ । सुव॑र्वती सु॒दुघा॑ न॒ᳶ पय॑स्वती दि॒शान्दे॒व्य॑वतु नो घृ॒ताची॑ । त्वङ्गो॒पाᳶ पु॑रए॒तोत प॒श्चाद्बृह॑स्पते॒ याम्याय्ँ॑युङ्ग्धि॒ वाच॑म् । ऊ॒र्ध्वा दि॒शाँ रन्ति॒राशौष॑धीनाँ सव्ँवत्स॒रेण॑ सवि॒ता नो॒ अह्ना॑म् । रे॒वत्सामाति॑च्छन्दा उ॒ छन्दोजा॑तशत्रुस्स्यो॒ना नो॑ अस्तु । स्तोम॑त्रयस्त्रिँशे॒ भुव॑नस्य पत्नि॒ विव॑स्वद्वाते अ॒भि नः॑ [36]
गृ॒णा॒हि॒ । घृ॒तव॑ती सवित॒राधि॑पत्यै॒ᳶ पय॑स्वती॒ रन्ति॒राशा॑ नो अस्तु । ध्रु॒वा दि॒शाव्ँवि॑ष्णुप॒त्न्यघो॑रा॒स्येशा॑ना॒ सह॑सो॒ या म॒नोता॑ । बृह॒स्पति॑र्मात॒रिश्वो॒त वा॒युस्स॑न्धुवा॒ना वाता॑ अ॒भि नो॑ गृणन्तु । वि॒ष्ट॒म्भो दि॒वो ध॒रुणᳶ॑ पृथि॒व्या अ॒स्येशा॑ना॒ जग॑तो॒ विष्णु॑पत्नी । वि॒श्वव्य॑चा इ॒षय॑न्ती॒ सुभू॑तिश्शि॒वा नो॑ अ॒स्त्वदि॑तिरु॒पस्थे॑ । वै॒श्वा॒न॒रो न॑ ऊ॒त्या पृ॒ष्टो दि॒व्यनु॑ नो॒ऽद्यानु॑मति॒रन्विद॑नुमते॒ त्वङ्कया॑ नश्चि॒त्र आ भु॑व॒त्को अ॒द्य यु॑ङ्क्ते ॥ [37]