८

अनु॑मत्यै पुरो॒डाश॑म॒ष्टाक॑पाल॒न्निर्व॑पति धे॒नुर्दक्षि॑णा॒ ये प्र॒त्यञ्च॒श्शम्या॑या अव॒शीय॑न्ते॒ तन्नै॑र्ऋ॒तमेक॑कपालङ्कृ॒ष्णव्ँवास॑ᳵ कृ॒ष्णतू॑ष॒न्दक्षि॑णा॒ वीहि॒ स्वाहाऽऽहु॑तिञ्जुषा॒ण ए॒ष ते॑ निर्ऋते भा॒गो भूते॑ ह॒विष्म॑त्यसि मु॒ञ्चेममँह॑स॒स्स्वाहा॒ नमो॒ य इ॒दञ्च॒कारा॑ऽऽदि॒त्यञ्च॒रुन्निर्व॑पति॒ वरो॒ दक्षि॑णाऽऽग्नावैष्ण॒वमेका॑दशकपालव्ँवाम॒नो व॒ही दक्षि॑णाऽग्नीषो॒मीय॑म् [1]
एका॑दशकपालँ॒ हिर॑ण्य॒न्दक्षि॑णै॒न्द्रमेका॑दशकपालमृष॒भो व॒ही दक्षि॑णाऽऽग्ने॒यम॒ष्टाक॑पालमै॒न्द्रन्दध्यृ॑ष॒भो व॒ही दक्षि॑णैन्द्रा॒ग्नन्द्वाद॑शकपालव्ँ वैश्वदे॒वञ्च॒रुम्प्र॑थम॒जो व॒त्सो दक्षि॑णा सौ॒म्यँ श्या॑मा॒कञ्च॒रुव्ँवासो॒ दक्षि॑णा॒ सर॑स्वत्यै च॒रुँ सर॑स्वते च॒रुम्मि॑थु॒नौ गावौ॒ दक्षि॑णा ॥ [2]
आ॒ग्ने॒यम॒ष्टाक॑पाल॒न्निर्व॑पति सौ॒म्यञ्च॒रुँ सा॑वि॒त्रन्द्वाद॑शकपालँ सारस्व॒तञ्च॒रुम्पौ॒ष्णञ्च॒रुम्मा॑रु॒तँ स॒प्तक॑पालव्ँ वैश्वदे॒वीमा॒मिक्षा॑न्द्यावापृथि॒व्य॑मेक॑कपालम् ॥ [3]
ऐ॒न्द्रा॒ग्नमेका॑दशकपालम्मारु॒तीमा॒मिक्षाव्ँ॑वारु॒णीमा॒मिक्षा॑ङ्का॒यमेक॑कपाल-म्प्रघा॒स्या॑न् हवामहे म॒रुतो॑ य॒ज्ञवा॑हसᳵ कर॒म्भेण॑ स॒जोष॑सः ॥ मो षू ण॑ इन्द्र पृ॒त्सु दे॒वास्तु॑ स्म ते शुष्मिन्नव॒या । म॒ही ह्य॑स्य मी॒ढुषो॑ य॒व्या । ह॒विष्म॑तो म॒रुतो॒ वन्द॑ते॒ गीः ॥ यद्ग्रामे॒ यदर॑ण्ये॒ यत् स॒भायाय्ँ॒यदि॑न्द्रि॒ये । यच्छू॒द्रे यद॒र्य॑ एन॑श्चकृ॒मा व॒यम् । यदेक॒स्याधि॒ धर्म॑णि॒ तस्या॑व॒यज॑नमसि॒ स्वाहा॑ ॥ अक्र॒न्कर्म॑ कर्म॒कृत॑स्स॒ह वा॒चा म॑योभु॒वा ॥ दे॒वेभ्य॒ᳵ कर्म॑ कृ॒त्वाऽस्त॒म्प्रेत॑ सुदानवः ॥ [4]
अ॒ग्नयेऽनी॑कवते पुरो॒डाश॑म॒ष्टाक॑पाल॒न्निर्व॑पति सा॒कँ सूर्ये॑णोद्य॒ता म॒रुद्भ्य॑स्सान्तप॒नेभ्यो॑ म॒ध्यन्दि॑ने च॒रुम्म॒रुद्भ्यो॑ गृहमे॒धिभ्य॒स्सर्वा॑सान्दु॒ग्धे सा॒यञ्च॒रुम्पू॒र्णा द॑र्वि॒ परा॑ पत॒ सुपू॑र्णा॒ पुन॒राप॑त । व॒स्नेव॒ वि क्री॑णावहा॒ इष॒मूर्जँ॑ शतक्रतो ॥ दे॒हि मे॒ ददा॑मि ते॒ नि मे॑ धेहि॒ नि ते॑ दधे । नि॒हार॒मिन्नि मे॑ हरा नि॒हार॑म् [5]
नि ह॑रामि ते ॥ म॒रुद्भ्य॑ᳵ क्री॒डिभ्यᳶ॑ पुरो॒डाशँ॑ स॒प्तक॑पाल॒न्निर्व॑पति सा॒कँ सूर्ये॑णोद्य॒ताग्ने॒यम॒ष्टाक॑पाल॒न्निर्व॑पति सौ॒म्यञ्च॒रुँ सा॑वि॒त्रन्द्वाद॑शकपालँ सारस्व॒तञ्च॒रुम्पौ॒ष्णञ्च॒रुमै॑न्द्रा॒ग्नमेका॑दशकपालमै॒न्द्रञ्च॒रुव्ँ वै॑श्वकर्म॒णमेक॑कपालम् ॥ [6]
सोमा॑य पितृ॒मते॑ पुरो॒डाशँ॒ षट्क॑पाल॒न्निर्व॑पति पि॒तृभ्यो॑ बर्हि॒षद्भ्यो॑ धा॒नाᳶ पि॒तृभ्यो॑ऽग्निष्वा॒त्तेभ्यो॑ऽभिवा॒न्या॑यै दु॒ग्धे म॒न्थमे॒तत्ते॑ तत॒ ये च॒ त्वामन्वे॒तत्ते॑ पितामह प्रपितामह॒ ये च॒ त्वामन्वत्र॑ पितरो यथाभा॒गम्म॑न्दध्वँ सुस॒न्दृश॑न्त्वा व॒यम्मघ॑वन्मन्दिषी॒महि॑ ॥ प्र नू॒नम्पू॒र्णव॑न्धुरस्स्तु॒तो या॑सि॒ वशाँ॒ अनु॑ ॥ योजा॒ न्वि॑न्द्र ते॒ हरी॑ ॥ [7]
अक्ष॒न्नमी॑मदन्त॒ ह्यव॑ प्रि॒या अ॑धूषत ॥ अस्तो॑षत॒ स्वभा॑नवो॒ विप्रा॒ नवि॑ष्ठया म॒ती ॥ योजा॒ न्वि॑न्द्र ते॒ हरी॑ ॥ अक्ष॑न्पि॒तरोऽमी॑मदन्त पि॒तरोऽती॑तृपन्त पि॒तरोऽमी॑मृजन्त पि॒तरः॑ ॥ परे॑त पितरस्सोम्या गम्भी॒रैᳶ प॒थिभिᳶ॑ पू॒र्व्यैः ॥ अथा॑ पि॒तॄन्त्सु॑वि॒दत्राँ॒ अपी॑त य॒मेन॒ ये स॑ध॒माद॒म्मद॑न्ति ॥ मनो॒ न्वा हु॑वामहे नाराशँ॒सेन॒ स्तोमे॑न पितृ॒णाञ्च॒ मन्म॑भिः ॥ आ [8]
न॒ ए॒तु॒ मन॒ᳶ पुन॒ᳵ क्रत्वे॒ दक्षा॑य जी॒वसे॑ ॥ ज्योक्च॒ सूर्य॑न्दृ॒शे ॥ पुन॑र्नᳶ पि॒तरो॒ मनो॒ ददा॑तु॒ दैव्यो॒ जनः॑ ॥ जी॒वव्व्ँरातँ॑ सचेमहि ॥ यद॒न्तरि॑क्षम्पृथि॒वीमु॒त द्याय्ँयन्मा॒तर॑म्पि॒तरव्ँ॑वा जिहिँसि॒म ॥ अ॒ग्निर्मा॒ तस्मा॒देन॑सो॒ गार्ह॑पत्य॒ᳶ प्र मु॑ञ्चतु दुरि॒ता यानि॑ चकृ॒म क॒रोतु॒ माम॑ने॒नस॑म् ॥ [9]
प्र॒ति॒पू॒रु॒षमेक॑कपाला॒न्निर्व॑प॒त्येक॒मति॑रिक्तय्ँ॒याव॑न्तो गृ॒ह्याः॑ स्मस्तेभ्य॒ᳵ कम॑करम्पशू॒नाँ शर्मा॑सि॒ शर्म॒ यज॑मानस्य॒ शर्म॑ मे य॒च्छैक॑ ए॒व रु॒द्रो न द्वि॒तीया॑य तस्थ आ॒खुस्ते॑ रुद्र प॒शुस्तञ्जु॑षस्वै॒ष ते॑ रुद्र भा॒गस्स॒ह स्वस्राऽम्बि॑कया॒ तञ्जु॑षस्व भेष॒जङ्गवेऽश्वा॑य॒ पुरु॑षाय भेष॒जमथो॑ अ॒स्मभ्य॑म्भेष॒जँ सुभे॑षजम् [10]
यथाऽस॑ति ॥ सु॒गम्मे॒षाय॑ मे॒ष्या॑ अवा॑म्ब रु॒द्रम॑दिम॒ह्यव॑ दे॒वन्त्र्य॑म्बकम् ॥ यथा॑ न॒श्श्रेय॑स॒ᳵ कर॒द्यथा॑ नो॒ वस्य॑स॒ᳵ कर॒द्यथा॑ नᳶ पशु॒मत॒ᳵ कर॒द्यथा॑ नो व्यवसा॒यया॑त् ॥ त्र्य॑म्बकय्ँयजामहे सुग॒न्धिम्पु॑ष्टि॒वर्ध॑नम् ॥ उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ माऽमृता॑त् ॥ ए॒ष ते॑ रुद्र भा॒गस्तञ्जु॑षस्व॒ तेना॑व॒सेन॑ प॒रो मूज॑व॒तोऽती॒ह्यव॑ततधन्वा॒ पिना॑कहस्त॒ᳵ कृत्ति॑वासाः ॥ [11]
ऐ॒न्द्रा॒ग्नन्द्वाद॑शकपालव्ँ वैश्वदे॒वञ्च॒रुमिन्द्रा॑य॒ शुना॒सीरा॑य पुरो॒डाश॒न्द्वाद॑शकपालव्ँवाय॒व्य॑म्पय॑स्सौ॒र्यमेक॑कपालन्द्वादशग॒वँ सीर॒न्दक्षि॑णाऽऽग्ने॒यम॒ष्टाक॑पाल॒न्निर्व॑पति रौ॒द्रङ्गा॑वीधु॒कञ्च॒रुमै॒न्द्रन्दधि॑ वारु॒णय्ँय॑व॒मय॑ञ्च॒रुव्ँव॒हिनी॑ धे॒नुर्दक्षि॑णा॒ ये दे॒वाᳶ पु॑र॒स्सदो॒ऽग्निने॑त्रा दक्षिण॒सदो॑ य॒मने॑त्राᳶ पश्चा॒त्सद॑स्सवि॒तृने॑त्रा उत्तर॒सदो॒ वरु॑णनेत्रा उपरि॒षदो॒ बृह॒स्पति॑नेत्रा रक्षो॒हण॒स्ते नᳶ॑ पान्तु॒ ते नो॑ऽवन्तु॒ तेभ्यः॑ [12]
नम॒स्तेभ्य॒स्स्वाहा॒ समू॑ढँ॒ रक्ष॒स्सन्द॑ग्धँ॒ रक्ष॑ इ॒दम॒हँ रक्षो॒ऽभि सन्द॑हाम्य॒ग्नये॑ रक्षो॒घ्ने स्वाहा॑ य॒माय॑ सवि॒त्रे वरु॑णाय॒ बृह॒स्पत॑ये॒ दुव॑स्वते रक्षो॒घ्ने स्वाहा॑ प्रष्टिवा॒ही रथो॒ दक्षि॑णा दे॒वस्य॑ त्वा सवि॒तुᳶ प्र॑स॒वे॑ऽश्विनो॑र्बा॒हुभ्या॑म्पू॒ष्णो हस्ता॑भ्याँ॒ रक्ष॑सो व॒धञ्जु॑होमि ह॒तँ रक्षोऽव॑धिष्म॒ रक्षो॒ यद्वस्ते॒ तद्दक्षि॑णा ॥ [13]
धा॒त्रे पु॑रो॒डाश॒न्द्वाद॑शकपाल॒न्निर्व॑प॒त्यनु॑मत्यै च॒रुँ रा॒कायै॑ च॒रुँ सि॑नीवा॒ल्यै च॒रुङ्कु॒ह्वै॑ च॒रुम्मि॑थु॒नौ गावौ॒ दक्षि॑णाऽऽग्नावैष्ण॒वमेका॑दशकपाल॒न्निर्व॑पत्यैन्द्रावैष्ण॒वमेका॑दशकपालव्ँ वैष्ण॒वन्त्रि॑कपा॒लव्ँवा॑म॒नो व॒ही दक्षि॑णा ऽग्नीषो॒मीय॒मेका॑दशकपाल॒न्निर्व॑पतीन्द्रासो॒मीय॒मेका॑दशकपालँ सौ॒म्यञ्च॒रुम्ब॒भ्रुर्दक्षि॑णा सोमापौ॒ष्णञ्च॒रुन्निर्व॑पत्यैन्द्रापौ॒ष्णञ्च॒रुम्पौ॒ष्णञ्च॒रुँ श्या॒मो दक्षि॑णा वैश्वान॒रन्द्वाद॑शकपाल॒न्निर्व॑पति॒ हिर॑ण्य॒न्दक्षि॑णा वारु॒णय्ँय॑व॒मय॑ञ्च॒रुमश्वो॒ दक्षि॑णा ॥ [14]
बा॒र्ह॒स्प॒त्यञ्च॒रुन्निर्व॑पति ब्र॒ह्मणो॑ गृ॒हे शि॑तिपृ॒ष्ठो दक्षि॑णै॒न्द्रमेका॑दशकपालँ राज॒न्य॑स्य गृ॒ह ऋ॑ष॒भो दक्षि॑णा ऽऽदि॒त्यञ्च॒रुम्महि॑ष्यै गृ॒हे धे॒नुर्दक्षि॑णा नैर्ऋ॒तञ्च॒रुम्प॑रिवृ॒क्त्यै॑ गृ॒हे कृ॒ष्णाना॑व्व्ँरीही॒णान्न॒खनि॑र्भिन्नङ्कृ॒ष्णा कू॒टा दक्षि॑णाऽऽग्ने॒यम॒ष्टाक॑पालँ सेना॒न्यो॑ गृ॒हे हिर॑ण्य॒न्दक्षि॑णा वारु॒णन्दश॑कपालँ सू॒तस्य॑ गृ॒हे म॒हानि॑रष्टो॒ दक्षि॑णा मारु॒तँ स॒प्तक॑पालङ्ग्राम॒ण्यो॑ गृ॒हे पृश्ञि॒र्दक्षि॑णा सावि॒त्रन्द्वाद॑शकपालं [15]
क्ष॒त्तुर्गृ॒ह उ॑पध्व॒स्तो दक्षि॑णाऽऽश्वि॒नन्द्वि॑कपा॒लँ स॑ङ्ग्रही॒तुर्गृ॒हे स॑वा॒त्यौ॑ दक्षि॑णा पौ॒ष्णञ्च॒रुम्भा॑गदु॒घस्य॑ गृ॒हे श्या॒मो दक्षि॑णा रौ॒द्रङ्गा॑वीधु॒कञ्च॒रुम॑क्षावा॒पस्य॑ गृ॒हे श॒बल॒ उद्वा॑रो॒ दक्षि॒णेन्द्रा॑य सु॒त्राम्णे॑ पुरो॒डाश॒मेका॑दशकपाल॒म्प्रति॒ निर्व॑प॒तीन्द्रा॑याँहो॒मुचे॒ऽयन्नो॒ राजा॑ वृत्र॒हा राजा॑ भू॒त्वा वृ॒त्रव्ँव॑ध्यान्मैत्राबार्हस्प॒त्यम्भ॑वति श्वे॒तायै॑ श्वे॒तव॑त्सायै दु॒ग्धे स्व॑यम्मू॒र्ते स्व॑यम्मथि॒त आज्य॒ आश्व॑त्थे [16]
पात्रे॒ चतु॑स्स्रक्तौ स्वयमवप॒न्नायै॒ शाखा॑यै क॒र्णाँश्चाक॑र्णाँश्च तण्डु॒लान् वि चि॑नुया॒द्ये क॒र्णास्स पय॑सि बार्हस्प॒त्यो येऽक॑र्णा॒स्स आज्ये॑ मै॒त्रस्स्व॑यङ्कृ॒ता वेदि॑र्भवति स्वयन्दि॒नम्ब॒र्हिस्स्व॑यङ्कृ॒त इ॒ध्मस्सैव श्वे॒ता श्वे॒तव॑त्सा॒ दक्षि॑णा ॥ [17]
अ॒ग्नये॑ गृ॒हप॑तये पुरो॒डाश॑म॒ष्टाक॑पाल॒न्निर्व॑पति कृ॒ष्णाना॑व्व्ँरीही॒णाँ सोमा॑य॒ वन॒स्पत॑ये श्यामा॒कञ्च॒रुँ स॑वि॒त्रे स॒त्यप्र॑सवाय पुरो॒डाश॒न्द्वाद॑शकपालमाशू॒नाव्व्ँरी॑ही॒णाँ रु॒द्राय॑ पशु॒पत॑ये गावीधु॒कञ्च॒रुम्बृह॒स्पत॑ये वा॒चस्पत॑ये नैवा॒रञ्च॒रुमिन्द्रा॑य ज्ये॒ष्ठाय॑ पुरो॒डाश॒मेका॑दशकपालम्म॒हाव्री॑हीणाम्मि॒त्राय॑ स॒त्याया॒ऽऽम्बाना॑ञ्च॒रुव्ँवरु॑णाय॒ धर्म॑पतये यव॒मय॑ञ्च॒रुँ स॑वि॒ता त्वा॑ प्रस॒वानाँ॑ सुवताम॒ग्निर्गृ॒हप॑तीनाँ॒ सोमो॒ वन॒स्पती॑नाँ रु॒द्रᳶ प॑शू॒नां [18]
बृह॒स्पति॑र्वा॒चामिन्द्रो॑ ज्ये॒ष्ठाना॑म्मि॒त्रस्स॒त्यानाव्ँ॒वरु॑णो॒ धर्म॑पतीनाय्ँ॒ये दे॑वा देव॒सुव॒स्स्थ त इ॒ममा॑मुष्याय॒णम॑नमि॒त्राय॑ सुवध्वम्मह॒ते क्ष॒त्त्राय॑ मह॒त आधि॑पत्याय मह॒ते जान॑राज्यायै॒ष वो॑ भरता॒ राजा॒ सोमो॒ऽस्माक॑म्ब्राह्म॒णानाँ॒ राजा॒ प्रति॒ त्यन्नाम॑ रा॒ज्यम॑धायि॒ स्वान्त॒नुवव्ँ॒वरु॑णो अशिश्रे॒च्छुचे॑र्मि॒त्रस्य॒ व्रत्या॑ अभू॒माम॑न्महि मह॒त ऋ॒तस्य॒ नाम॒ सर्वे॒ व्राता॒ वरु॑णस्याभूव॒न्वि मि॒त्र एवै॒ररा॑तिमतारी॒दसू॑षुदन्त य॒ज्ञिया॑ ऋ॒तेन॒ व्यु॑ त्रि॒तो ज॑रि॒माण॑न्न आन॒ड्विष्णो॒ᳵ क्रमो॑ऽसि॒ विष्णोः॑ क्रा॒न्तम॑सि॒ विष्णो॒र्विक्रा॑न्तमसि ॥ [19]
अ॒र्थेत॑स्स्था॒ऽपाम्पति॑रसि॒ वृषा॑स्यू॒र्मिर्वृ॑षसे॒नो॑ऽसि व्रज॒क्षित॑स्स्थ म॒रुता॒मोज॑स्स्थ॒ सूर्य॑वर्चसस्स्थ॒ सूर्य॑त्वचसस्स्थ॒ मान्दाः॑ स्थ॒ वाशाः॑ स्थ॒ शक्व॑रीस्स्थ विश्व॒भृत॑स्स्थ जन॒भृत॑स्स्था॒ऽग्नेस्ते॑ज॒स्याः॑ स्था॒ऽपामोष॑धीनाँ॒ रस॑स्स्था॒ऽपो दे॒वीर्मधु॑मतीरगृह्ण॒न्नूर्ज॑स्वती राज॒सूया॑य॒ चिता॑नाः । याभि॑र्मि॒त्रावरु॑णाव॒भ्यषि॑ञ्च॒न्याभि॒रिन्द्र॒मन॑य॒न्नत्यरा॑तीः ॥ रा॒ष्ट्र॒दास्स्थ॑ रा॒ष्ट्रन्द॑त्त॒ स्वाहा॑ राष्ट्र॒दास्स्थ॑ रा॒ष्ट्रम॒मुष्मै॑ दत्त ॥ [20]
देवी॑राप॒स्सम्मधु॑मती॒र्मधु॑मतीभिस्सृज्यध्व॒म्महि॒ वर्चः॑ क्ष॒त्रिया॑य वन्वा॒ना अना॑धृष्टास्सीद॒तोर्ज॑स्वती॒र्महि॒ वर्चः॑ क्ष॒त्रिया॑य॒ दध॑ती॒रनि॑भृष्टमसि वा॒चो बन्धु॑स्तपो॒जास्सोम॑स्य दा॒त्रम॑सि शु॒क्रा व॑श्शु॒क्रेणोत्पु॑नामि च॒न्द्राश्च॒न्द्रेणा॒मृता॑ अ॒मृते॑न॒ स्वाहा॑ राज॒सूया॑य॒ चिता॑नाः ॥ स॒ध॒मादो॑ द्यु॒म्निनी॒रूर्ज॑ ए॒ता अनि॑भृष्टा अप॒स्युवो॒ वसा॑नः । प॒स्त्या॑सु चक्रे॒ वरु॑णस्स॒धस्थ॑म॒पाँ शिशुः॑ [21]
मा॒तृत॑मास्व॒न्तः ॥ क्ष॒त्त्रस्योल्ब॑मसि क्ष॒त्रस्य॒ योनि॑र॒स्यावि॑न्नो अ॒ग्निर्गृ॒हप॑ति॒रावि॑न्न॒ इन्द्रो॑ वृ॒द्धश्र॑वा॒ आवि॑न्नᳶ पू॒षा वि॒श्ववे॑दा॒ आवि॑न्नौ मि॒त्रावरु॑णावृता॒वृधा॒वावि॑न्ने॒ द्यावा॑पृथि॒वी धृ॒तव्र॑ते॒ आवि॑न्ना दे॒व्यदि॑तिर्विश्वरू॒प्यावि॑न्नो॒ऽयम॒सावा॑मुष्याय॒णो॑ऽस्याव्ँवि॒श्य॑स्मिन्रा॒ष्ट्रे म॑ह॒ते क्ष॒त्राय॑ मह॒त आधि॑पत्याय मह॒ते जान॑राज्यायै॒ष वो॑ भरता॒ राजा॒ सोमो॒ऽस्माक॑म्ब्राह्म॒णानाँ॒ राजेन्द्र॑स्य [22]
वज्रो॑ऽसि॒ वार्त्र॑घ्न॒स्त्वया॒ऽयव्ँवृ॒त्रव्ँव॑ध्याच्छत्रु॒बाध॑नास्स्थ पा॒त मा॑ प्र॒त्यञ्च॑म्पा॒त मा॑ ति॒र्यञ्च॑म॒न्वञ्च॑म्मा पात दि॒ग्भ्यो मा॑ पात॒ विश्वा॑भ्यो मा ना॒ष्ट्राभ्यᳶ॑ पात॒ हिर॑ण्यवर्णावु॒षसाव्ँ॑विरो॒केऽय॑स्स्थूणा॒वुदि॑तौ॒ सूर्य॒स्याऽऽरो॑हतव्ँवरुण मित्र॒ गर्त॒न्तत॑श्चक्षाथा॒मदि॑ति॒न्दिति॑ञ्च ॥ [23]
स॒मिध॒मा ति॑ष्ठ गाय॒त्री त्वा॒ छन्द॑सामवतु त्रि॒वृत्स्तोमो॑ रथन्त॒रँ सामा॒ग्निर्दे॒वता॒ ब्रह्म॒ द्रवि॑णमु॒ग्रामा ति॑ष्ठ त्रि॒ष्टुप्त्वा॒ छन्द॑सामवतु पञ्चद॒शस्स्तोमो॑ बृ॒हत्सामेन्द्रो॑ दे॒वता॑ क्ष॒त्त्रन्द्रवि॑णव्ँवि॒राज॒मा ति॑ष्ठ॒ जग॑ती त्वा॒ छन्द॑सामवतु सप्तद॒शस्स्तोमो॑ वैरू॒पँ साम॑ म॒रुतो॑ दे॒वता॒ विड्द्रवि॑ण॒मुदी॑ची॒मा ति॑ष्ठानु॒ष्टुप्त्वा॑ [24]
छन्द॑सामवत्वेकविँ॒शस्स्तोमो॑ वैरा॒जँ साम॑ मि॒त्रावरु॑णौ दे॒वता॒ बल॒न्द्रवि॑णमू॒र्ध्वामा ति॑ष्ठ प॒ङ्क्तिस्त्वा॒ छन्द॑सामवतु त्रिणवत्रयस्त्रिँ॒शौ स्तोमौ॑ शाक्वररैव॒ते साम॑नी॒ बृह॒स्पति॑र्दे॒वता॒ वर्चो॒ द्रवि॑णमी॒दृङ्चा॑न्या॒दृङ्चै॑ता॒दृङ्च॑ प्रति॒दृङ्च॑ मि॒तश्च॒ सम्मि॑तश्च॒ सभ॑राः । शु॒क्रज्यो॑तिश्च चि॒त्रज्यो॑तिश्च स॒त्यज्यो॑तिश्च॒ ज्योति॑ष्माँश्च स॒त्यश्च॑र्त॒पाश्च॑ [25]
अत्यँ॑हाः । अ॒ग्नये॒ स्वाहा॒ सोमा॑य॒ स्वाहा॑ सवि॒त्रे स्वाहा॒ सर॑स्वत्यै॒ स्वाहा॑ पू॒ष्णे स्वाहा॒ बृह॒स्पत॑ये॒ स्वाहेन्द्रा॑य॒ स्वाहा॒ घोषा॑य॒ स्वाहा॒ श्लोका॑य॒ स्वाहाऽँशा॑य॒ स्वाहा॒ भगा॑य॒ स्वाहा॒ क्षेत्र॑स्य॒ पत॑ये॒ स्वाहा॑ पृथि॒व्यै स्वाहा॒ऽन्तरि॑क्षाय॒ स्वाहा॑ दि॒वे स्वाहा॒ सूर्या॑य॒ स्वाहा॑ च॒न्द्रम॑से॒ स्वाहा॒ नक्ष॑त्रेभ्य॒स्स्वाहा॒ऽद्भ्यस्स्वाहौष॑धीभ्य॒स्स्वाहा॒ वन॒स्पति॑भ्य॒स्स्वाहा॑ चराच॒रेभ्य॒स्स्वाहा॑ परिप्ल॒वेभ्य॒स्स्वाहा॑ सरीसृ॒पेभ्य॒स्स्वाहा॑ ॥ [26]
सोम॑स्य॒ त्विषि॑रसि॒ तवे॑व मे॒ त्विषि॑र्भूयाद॒मृत॑मसि मृ॒त्योर्मा॑ पाहि दि॒द्योन्मा॑ पा॒ह्यवे॑ष्टा दन्द॒शूका॒ निर॑स्त॒न्नमु॑चे॒श्शिरः॑ ॥ सोमो॒ राजा॒ वरु॑णो दे॒वा ध॑र्म॒सुव॑श्च॒ ये । ते ते॒ वाचँ॑ सुवन्ता॒न्ते ते॑ प्रा॒णँ सु॑वन्ता॒न्ते ते॒ चक्षु॑स्सुवन्ता॒न्ते ते॒ श्रोत्रँ॑ सुवन्ताँ॒ सोम॑स्य त्वा द्यु॒म्नेना॒भिषि॑ञ्चाम्य॒ग्नेः [27]
तेज॑सा॒ सूर्य॑स्य॒ वर्च॒सेन्द्र॑स्येन्द्रि॒येण॑ मि॒त्रावरु॑णयोर्वी॒र्ये॑ण म॒रुता॒मोज॑सा क्ष॒त्त्राणा॑ङ्क्ष॒त्त्रप॑तिर॒स्यति॑ दि॒वस्पा॑हि स॒माव॑वृत्रन्नध॒रागुदी॑ची॒रहि॑म्बु॒ध्निय॒मनु॑ स॒ञ्चर॑न्ती॒स्ताᳶ पर्व॑तस्य वृष॒भस्य॑ पृ॒ष्ठे नाव॑श्चरन्ति स्व॒सिच॑ इया॒नाः ॥ रुद्र॒ यत्ते॒ क्रयी॒ पर॒न्नाम॒ तस्मै॑ हु॒तम॑सि य॒मेष्ट॑मसि । प्रजा॑पते॒ न त्वदे॒तान्य॒न्यो विश्वा॑ जा॒तानि॒ परि॒ ता ब॑भूव । यत्का॑मास्ते जुहु॒मस्तन्नो॑ अस्तु व॒यँ स्या॑म॒ पत॑यो रयी॒णाम् ॥ [28]
इन्द्र॑स्य॒ वज्रो॑ऽसि॒ वार्त्र॑घ्न॒स्त्वया॒ऽयव्ँवृ॒त्रव्ँव॑ध्यान्मि॒त्रावरु॑णयोस्त्वा प्रशा॒स्त्रोᳶ प्र॒शिषा॑ युनज्मि य॒ज्ञस्य॒ योगे॑न॒ विष्णो॒ᳵ क्रमो॑ऽसि॒ विष्णोः॑ क्रा॒न्तम॑सि॒ विष्णो॒र्विक्रा॑न्तमसि म॒रुता॑म्प्रस॒वे जे॑षमा॒प्तम्मन॒स्सम॒हमि॑न्द्रि॒येण॑ वी॒र्ये॑ण पशू॒नाम्म॒न्युर॑सि॒ तवे॑व मे म॒न्युर्भू॑या॒न्नमो॑ मा॒त्रे पृ॑थि॒व्यै माऽहम्मा॒तर॑म्पृथि॒वीँ हिँ॑सिष॒म्मा [29]
माम्मा॒ता पृ॑थि॒वी हिँ॑सी॒दिय॑द॒स्यायु॑र॒स्यायु॑र्मे धे॒ह्यूर्ग॒स्यूर्ज॑म्मे धेहि॒ युङ्ङ॑सि॒ वर्चो॑ऽसि॒ वर्चो॒ मयि॑ धेह्य॒ग्नये॑ गृ॒हप॑तये॒ स्वाहा॒ सोमा॑य॒ वन॒स्पत॑ये॒ स्वाहेन्द्र॑स्य॒ बला॑य॒ स्वाहा॑ म॒रुता॒मोज॑से॒ स्वाहा॑ हँ॒सश्शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् । नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तम्बृ॒हत् ॥ [30]
मि॒त्रो॑ऽसि॒ वरु॑णोऽसि॒ सम॒हव्ँविश्वै॑र्दे॒वैः क्ष॒त्त्रस्य॒ नाभि॑रसि क्ष॒त्त्रस्य॒ योनि॑रसि स्यो॒नामा सी॑द सु॒षदा॒मा सी॑द॒ मा त्वा॑ हिँसी॒न्मा मा॑ हिँसी॒न्निष॑साद धृ॒तव्र॑तो॒ वरु॑णᳶ प॒स्त्या॑स्वा साम्रा॑ज्याय सु॒क्रतु॒र्ब्रह्मा ३ न्त्वँ रा॑जन्ब्र॒ह्माऽसि॑ सवि॒ताऽसि॑ स॒त्यस॑वो॒ ब्रह्मा ३ न्त्वँ रा॑जन्ब्र॒ह्माऽसीन्द्रो॑ऽसि स॒त्यौजाः॑ [31]
ब्रह्मा ३ न्त्वँ रा॑जन्ब्र॒ह्माऽसि॑ मि॒त्रो॑ऽसि सु॒शेवो॒ ब्रह्मा ३ न्त्वँ रा॑जन्ब्र॒ह्माऽसि॒ वरु॑णोऽसि स॒त्यध॒र्मेन्द्र॑स्य॒ वज्रो॑ऽसि॒ वार्त्र॑घ्न॒स्तेन॑ मे रध्य॒ दिशो॒ऽभ्य॑यँ राजा॑ऽभू॒त् सुश्लो॒काँ ४ सुम॑ङ्ग॒लाँ ४ सत्य॑रा॒जा ३ न् । अ॒पान्नप्त्रे॒ स्वाहो॒र्जो नप्त्रे॒ स्वाहा॒ऽग्नये॑ गृ॒हप॑तये॒ स्वाहा॑ ॥ [32]
आ॒ग्ने॒यम॒ष्टाक॑पाल॒न्निर्व॑पति॒ हिर॑ण्य॒न्दक्षि॑णा सारस्व॒तञ्च॒रुव्ँव॑त्सत॒री दक्षि॑णा सावि॒त्रन्द्वाद॑शकपालमुपध्व॒स्तो दक्षि॑णा पौ॒ष्णञ्च॒रुँ श्या॒मो दक्षि॑णा बार्हस्प॒त्यञ्च॒रुँ शि॑तिपृ॒ष्ठो दक्षि॑णै॒न्द्रमेका॑दशकपालमृष॒भो दक्षि॑णा वारु॒णन्दश॑कपालम्म॒हानि॑रष्टो॒ दक्षि॑णा सौ॒म्यञ्च॒रुम्ब॒भ्रुर्दक्षि॑णा त्वा॒ष्ट्रम॒ष्टाक॑पालँ शु॒ण्ठो दक्षि॑णा वैष्ण॒वन्त्रि॑कपा॒लव्ँवा॑म॒नो दक्षि॑णा ॥ [33]
स॒द्यो दी॑क्षयन्ति स॒द्यस्सोम॑ङ्क्रीणन्ति पुण्डरिस्र॒जाम्प्र य॑च्छति द॒शभि॑र्वत्सत॒रैस्सोम॑ङ्क्रीणाति दश॒पेयो॑ भवति श॒तम्ब्रा॑ह्म॒णाᳶ पि॑बन्ति सप्तद॒शँ स्तो॒त्रम्भ॑वति प्राका॒शाव॑ध्व॒र्यवे॑ ददाति॒ स्रज॑मुद्गा॒त्रे रु॒क्मँ होत्रेऽश्व॑म्प्रस्तोतृप्रतिह॒र्तृभ्या॒न्द्वाद॑श पष्ठौ॒हीर्ब्र॒ह्मणे॑ व॒शाम्मै॑त्रावरु॒णाय॑र्ष॒भम्ब्रा॑ह्मणाच्छँ॒सिने॒ वास॑सी नेष्टापो॒तृभ्याँ॒ स्थूरि॑ यवाचि॒तम॑च्छावा॒काया॑न॒ड्वाह॑म॒ग्नीधे॑ भार्ग॒वो होता॑ भवति श्राय॒न्तीय॑म्ब्रह्मसा॒मम्भ॑वति वारव॒न्तीय॑मग्निष्टोमसा॒मँ सा॑रस्व॒तीर॒पो गृ॑ह्णाति ॥ [34]
आ॒ग्ने॒यम॒ष्टाक॑पाल॒न्निर्व॑पति॒ हिर॑ण्य॒न्दक्षि॑णै॒न्द्रमेका॑दशकपालमृष॒भो दक्षि॑णा वैश्वदे॒वञ्च॒रुम्पि॒शङ्गी॑ पष्ठौ॒ही दक्षि॑णा मैत्रावरु॒णीमा॒मिक्षाव्ँ॑व॒शा दक्षि॑णा बार्हस्प॒त्यञ्च॒रुँ शि॑तिपृ॒ष्ठो दक्षि॑णाऽऽदि॒त्याम्म॒ल्‌॒हाङ्ग॒र्भिणी॒मा ल॑भते मारु॒तीम्पृश्ञि॑म्पष्ठौ॒हीम॒श्विभ्या॑म्पू॒ष्णे पु॑रो॒डाश॒न्द्वाद॑शकपाल॒न्निर्व॑पति॒ सर॑स्वते सत्य॒वाचे॑ च॒रुँ स॑वि॒त्रे स॒त्यप्र॑सवाय पुरो॒डाश॒न्द्वाद॑शकपालन्तिसृध॒न्वँ शु॑ष्कदृ॒तिर्दक्षि॑णा ॥ [35]
आ॒ग्ने॒यम॒ष्टाक॑पाल॒न्निर्व॑पति सौ॒म्यञ्च॒रुँ सा॑वि॒त्रन्द्वाद॑शकपालम्बार्हस्प॒त्यञ्च॒रुन्त्वा॒ष्ट्रम॒ष्टाक॑पालव्ँ वैश्वान॒रन्द्वाद॑शकपाल॒न्दक्षि॑णो रथवाहनवा॒हो दक्षि॑णा सारस्व॒तञ्च॒रुन्निर्व॑पति पौ॒ष्णञ्च॒रुम्मै॒त्रञ्च॒रुव्ँवा॑रु॒णञ्च॒रुङ्क्षै॑त्रप॒त्यञ्च॒रुमा॑दि॒त्यञ्च॒रुमुत्त॑रो रथवाहनवा॒हो दक्षि॑णा ॥ [36]
स्वा॒द्वीन्त्वा॑ स्वा॒दुना॑ ती॒व्रान्ती॒व्रेणा॒मृता॑म॒मृते॑न सृ॒जामि॒ सँ सोमे॑न॒ सोमो॑ऽस्य॒श्विभ्या॑म्पच्यस्व॒ सर॑स्वत्यै पच्य॒स्वेन्द्रा॑य सु॒त्राम्णे॑ पच्यस्व पु॒नातु॑ ते परि॒स्रुतँ॒ सोमँ॒ सूर्य॑स्य दुहि॒ता । वारे॑ण॒ शश्व॑ता॒ तना॑ ॥ वा॒युᳶ पू॒तᳶ प॒वित्रे॑ण प्र॒त्यङ्क्सोमो॒ अति॑द्रुतः । इन्द्र॑स्य॒ युज्य॒स्सखा॑ ॥ कु॒विद॒ङ्ग यव॑मन्तो॒ यव॑ञ्चि॒द्यथा॒ दान्त्य॑नुपू॒र्वव्ँवि॒यूय॑ । इ॒हेहै॑षाङ्कृणुत॒ भोज॑नानि॒ ये ब॒र्हिषो॒ नमो॑वृक्ति॒न्न ज॒ग्मुः ॥ आ॒श्वि॒नन्धू॒म्रमा ल॑भते सारस्व॒तम्मे॒षमै॒न्द्रमृ॑ष॒भमै॒न्द्रमेका॑दशकपाल॒न्निर्व॑पति सावि॒त्रन्द्वाद॑शकपालव्ँवारु॒णन्दश॑कपालँ॒ सोम॑प्रतीकाᳶ पितरस्तृप्णुत॒ वड॑बा॒ दक्षि॑णा ॥ [37]
अग्ना॑विष्णू॒ महि॒ तद्वा॑म्महि॒त्वव्ँवी॒तङ्घृ॒तस्य॒ गुह्या॑नि॒ नाम॑ । दमे॑दमे स॒प्त रत्ना॒ दधा॑ना॒ प्रति॑ वाञ्जि॒ह्वा घृ॒तमा च॑रण्येत् ॥ अग्ना॑विष्णू॒ महि॒ धाम॑ प्रि॒यव्ँवाव्ँ॑वी॒थो घृ॒तस्य॒ गुह्या॑ जुषा॒णा । दमे॑दमे सुष्टु॒तीर्वा॑वृधा॒ना प्रति॑ वाञ्जि॒ह्वा घृ॒तमुच्च॑रण्येत् ॥ प्र णो॑ दे॒वी सर॑स्वती॒ वाजे॑भिर्वा॒जिनी॑वती । धी॒नाम॑वि॒त्र्य॑वतु । आ नो॑ दि॒वो बृ॑ह॒तः [38]
पर्व॑ता॒दा सर॑स्वती यज॒ता ग॑न्तु य॒ज्ञम् । हव॑न्दे॒वी जु॑जुषा॒णा घृ॒ताची॑ श॒ग्मान्नो॒ वाच॑मुश॒ती शृ॑णोतु ॥ बृह॑स्पते जु॒षस्व॑ नो ह॒व्यानि॑ विश्वदेव्य । रास्व॒ रत्ना॑नि दा॒शुषे॑ ॥ ए॒वा पि॒त्रे वि॒श्वदे॑वाय॒ वृष्णे॑ य॒ज्ञैर्वि॑धेम॒ नम॑सा ह॒विर्भिः॑ । बृह॑स्पते सुप्र॒जा वी॒रव॑न्तो व॒यँ स्या॑म॒ पत॑यो रयी॒णाम् ॥ बृह॑स्पते॒ अति॒ यद॒र्यो अर्हा॑द्द्यु॒मद्वि॒भाति॒ क्रतु॑म॒ज्जने॑षु । यद्दी॒दय॒च्छव॑सा [39]
ऋ॒त॒प्र॒जा॒त॒ तद॒स्मासु॒ द्रवि॑णन्धेहि चि॒त्रम् ॥ आ नो॑ मित्रावरुणा घृ॒तैर्गव्यू॑तिमुक्षतम् । मध्वा॒ रजाँ॑सि सुक्रतू ॥ प्र बा॒हवा॑ सिसृतञ्जी॒वसे॑ न॒ आ नो॒ गव्यू॑तिमुक्षतङ्घृ॒तेन॑ । आ नो॒ जने॑ श्रवयतय्ँयुवाना श्रु॒तम्मे॑ मित्रावरुणा॒ हवे॒मा ॥ अ॒ग्निव्ँवᳶ॑ पू॒र्व्यङ्गि॒रा दे॒वमी॑डे॒ वसू॑नाम् । स॒प॒र्यन्तᳶ॑ पुरुप्रि॒यम्मि॒त्रन्न क्षे॑त्र॒साध॑सम् ॥ म॒क्षू दे॒वव॑तो॒ रथः॑ [40]
शूरो॑ वा पृ॒त्सु कासु॑ चित् । दे॒वानाय्ँ॒य इन्मनो॒ यज॑मान॒ इय॑क्षत्य॒भीदय॑ज्वनो भुवत् ॥ न य॑जमान रिष्यसि॒ न सु॑न्वान॒ न दे॑वयो ॥ अस॒दत्र॑ सु॒वीर्य॑मु॒त त्यदा॒श्वश्वि॑यम् ॥ नकि॒ष्टङ्कर्म॑णा नश॒न्न प्र यो॑ष॒न्न यो॑षति ॥ उप॑ क्षरन्ति॒ सिन्ध॑वो मयो॒भुव॑ ईजा॒नञ्च॑ य॒क्ष्यमा॑णञ्च धे॒नवः॑ । पृ॒णन्त॑ञ्च॒ पपु॑रिञ्च [41]
श्र॒व॒स्यवो॑ घृ॒तस्य॒ धारा॒ उप॑ यन्ति वि॒श्वतः॑ ॥ सोमा॑रुद्रा॒ वि वृ॑हतव्ँ॒विषू॑ची॒ममी॑वा॒ या नो॒ गय॑मावि॒वेश॑ । आ॒रे बा॑धेथा॒न्निर्ऋ॑तिम्परा॒चैᳵ कृ॒तञ्चि॒देन॒ᳶ प्रमु॑मुक्तम॒स्मत् ॥ सोमा॑रुद्रा यु॒वमे॒तान्य॒स्मे विश्वा॑ त॒नूषु॑ भेष॒जानि॑ धत्तम् । अव॑ स्यतम्मु॒ञ्चतय्ँ॒यन्नो॒ अस्ति॑ त॒नूषु॑ ब॒द्धङ्कृ॒तमेनो॑ अ॒स्मत् ॥ सोमा॑पूषणा॒ जन॑ना रयी॒णाञ्जन॑ना दि॒वो जन॑ना पृथि॒व्याः । जा॒तौ विश्व॑स्य॒ भुव॑नस्य गो॒पौ दे॒वा अ॑कृण्वन्न॒मृत॑स्य॒ नाभि॑म् ॥ इ॒मौ दे॒वौ जाय॑मानौ जुषन्ते॒मौ तमाँ॑सि गूहता॒मजु॑ष्टा । आ॒भ्यामिन्द्रᳶ॑ प॒क्वमा॒मास्व॒न्तस्सो॑मापू॒षभ्या॑ञ्जनदु॒स्रिया॑सु ॥ [42]