विश्वास-प्रस्तुतिः
श्रमा॑य कौला॒लम् +++(=कुम्भकार-जम्)+++ ।
मूलम्
श्रमा॑य कौला॒लम् ।
भट्टभास्कर-टीका
1श्रमाय शान्तये कौलालम् । स्वार्थिकोऽण् । यः श्रमेणैव जीवति ।
विश्वास-प्रस्तुतिः
मा॒यायै॑ कार्मा॒रम्+++(=लोहकारम्)+++ ।
मूलम्
मा॒यायै॑ कार्मा॒रम् ।
भट्टभास्कर-टीका
मायायै विचित्रकरणशक्त्यै कार्मारं लोहकारम् ।
विश्वास-प्रस्तुतिः
रू॒पाय॑ मणिका॒रम् ।
मूलम्
रू॒पाय॑ मणिका॒रम् ।
भट्टभास्कर-टीका
रूपाय शुक्लादिकाय मणिकारं माणिक्यादिविविधमणिसंस्कारकर्तारम् ।
विश्वास-प्रस्तुतिः
शुभे॑ व॒पम् +++(=बीजवप्तारम्)+++।
मूलम्
शुभे॑ व॒पम् ।
भट्टभास्कर-टीका
शुभे शोभायै वपं वप्तारम् । पचाद्यच् । अधोवप्तारमिति केचित् ।
विश्वास-प्रस्तुतिः
श॒र॒व्या॑या+++(=बाणलक्ष्यदेव्यै)+++ इषुका॒रम् ।
मूलम्
श॒र॒व्या॑या इषुका॒रम् ।
भट्टभास्कर-टीका
शरव्यायै शरणशक्त्यै । व्याख्यातं पदम् । इषुसमूहाय वा । इषुकारं इषूणां संस्कर्तारम् ।
विश्वास-प्रस्तुतिः
हे॒त्यै ध॑न्वका॒रम् ।
मूलम्
हे॒त्यै ध॑न्वका॒रम् ।
भट्टभास्कर-टीका
हेत्यै हिंसायै । ‘ऊतियूति’ इति क्तिन उदात्तत्वम् । धन्वकारं धनुषां संस्कारम् ।
विश्वास-प्रस्तुतिः
कर्म॑णे ज्याका॒रम् ।
मूलम्
कर्म॑णे ज्याका॒रम् ।
भट्टभास्कर-टीका
कर्मणे ज्याकारम् । ज्यां संस्कर्तारं कारूणां कुशलम् ।
विश्वास-प्रस्तुतिः
दि॒ष्टाय॑ +++(=भवितव्याय)+++ रज्जुस॒र्गम् ।
मूलम्
दि॒ष्टाय॑ रज्जुस॒र्गम् ।
भट्टभास्कर-टीका
दिष्टाय दैवाय भविष्यतायै रज्जुसर्गं उद्वन्धकं, स ह्यात्मविनिपाताय रज्जुं सृजति । कर्मण्यणि छान्दसं कुत्वम् ।
विश्वास-प्रस्तुतिः
मृ॒त्य॑वे मृग॒युम् ।
मूलम्
मृ॒त्य॑वे मृग॒युम् ।
भट्टभास्कर-टीका
मृत्यवे मरणाय मृगयुं मृगाणां हन्तारम् ।
विश्वास-प्रस्तुतिः
अन्त॑काय श्व॒नित॑म् +++(=श्वक्रीडाजीवी)+++ ॥ 3 ॥
मूलम्
अन्त॑काय श्व॒नित॑म् ॥3॥
भट्टभास्कर-टीका
अन्तकाय प्राणापहारिणे श्वनितं श्वक्रीडाजीविनं श्वभिः नीतः प्राप्तः । छान्दसं ह्रस्वत्वम् । ‘परादिश्छन्दसि’ इत्युत्तरपदान्तोदात्तत्वम् ॥
इति तृतीये चतुर्थे तृतीयोऽनुवाकः ॥