+आन्ध्र-पाठः

वागीशाद्याः सुमनसः
सर्वार्थानामुपक्रमे ।
यं नत्वा कृतकृत्याः स्युस्
तं नमामि गजाननम् ॥ १ ॥

यस्य निश्वसितं वेदा
यो वेदेभ्योऽखिलं जगत् ।
निर्ममे तमहं वन्दे
विद्यातीर्थमहेश्वरम् ॥ २ ॥

तत्-कटाक्षेण तद्रूपं
दधद् बुक्क-महीपतिः ।
आदिशन् माधवाचार्यं
वेदार्थस्य प्रकाशने ॥ ३ ॥

ये पूर्वोत्तरमीमांसे
ते व्याख्यायातिसंग्रहात् ।
कृपालुः सायणाचार्यो
वेदार्थं वक्तुमुद्यतः ॥ ४ ॥

व्याख्याता सुखबोधार्थं
तैत्तिरीयकसंहिता ।
तद्ब्राह्मणं च व्याख्यातं
शिष्टमारण्यकं ततः ॥ ५ ॥

अरण्याध्ययनाद् एतद्
आरण्यकम् इतीर्यते । अरण्ये तद् अधीयीतेत्य्
एवं वाक्यं प्रवक्ष्यते ॥ ६ ॥

काण्डम् आरण्यकं सर्वं
व्याख्यातव्यं प्रयत्नतः ।
आरण्यकविशेषास्तु
पर्वाचार्यैर् उदीरितः ॥ ७ ॥

होतॄन् प्रवर्ग्य-काण्डं च
याश्चोपनिषदो विदुः ।
आरुणीयविधिश् चैव
काठके परिकीर्तितः ॥ ८ ॥ .

रुद्रो नारायणश्चैव
मेधो यश्चैव पित्रियः ।
एतद् आरण्यकं सर्वं
नाव्रती श्रोतुमर्हति ॥ ९ ॥