प्रजापतेः प्रियां अनार्तां आर्तिरहितां तनुवं शरीरभूतमिदं कर्म ईश्वरस्य क्रियाशक्तेः वातात्मिकायाः परिणामविशेषं प्रपद्ये ।

इ॒दम॒हम्प॑ञ्चद॒शेन॒ वज्रे॑ण ।
द्वि॒षन्त॒म्भ्रातृ॑व्य॒मव॑क्रामामि ।

इ॒दम॒हम्प॑ञ्चद॒शेन॒ वज्रे॑ण द्वि॒षन्त॒म्भ्रातृ॑व्य॒मव॑क्रामामि ।

इ॒दम॒हम्प॑ञ्चद॒शेन॒ वज्रे॑ण द्वि॒षन्त॒म्भ्रातृ॑व्य॒मव॑क्रामामि ।

यस्मादेवं तस्मात्, इदमिति क्रियाविशेषणम् । पञ्चदशेन पञ्चदशस्तोमसदृशेन पञ्चदशधारेण वज्रेण द्विषन्तं भ्रातृव्यं शत्रुं अवक्रामामि अवष्टभ्य पीडयामि । ममायमारम्भः तस्यैवाक्रमणमिति ।

यो॑ऽस्मान्द्वेष्टि॑ ।
यञ्च॑ व॒यन्द्वि॒ष्मः ।
भूर्भुव॒स्सुवः॑ ।
हिम् ॥1॥

यो॑ऽस्मान्द्वेष्टि॒ यञ्च॑ व॒यन्द्वि॒ष्मो भूर्भुव॒स्सुव॒र् हिम् ॥1॥

यो॑ऽस्मान्द्वेष्टि॒ यञ्च॑ व॒यन्द्वि॒ष्मो भूर्भुव॒स्सुव॒र् हिम् ॥1॥

योऽस्मान् द्वेष्टि अस्माभिरविज्ञातः । यं च वयं द्विष्मः तेनाविज्ञाताः । तत एवं कृते भूर्भुवस्सुवः त्रिष्वपि लोकेषु हिं गन्ता भवामि, विश्वं व्याप्य तिष्ठामि, विश्वस्य प्रीणयिता भवामि, यागद्वारेण विश्वं धारयामि । हि गतौ हिवि प्रीणने, अन्यतरस्येदं छान्दसं रूपम् ॥

इति तैत्तिरीयब्राह्मणे तृतीये पञ्चमे इष्टिहौत्रे प्रथमोऽनुवाकः ॥