३७५

तदाहुर्यदन्यानि सत्राणि रात्रिभिराख्यायन्तेऽथ कस्माद्द्वादशाहोऽहोभिराख्यायत इति ।

स ब्रूयाद्विश्वे वै देवाः पितरं प्रजापतिमुपेत्याब्रुवन्कियान्स्विद्भवानिति ।

सोऽब्रवीद्द्वादशाहमस्मीति ।

यदब्रवीद्द्वादशाहमस्मीति तद्द्वादशाहस्य द्वादशाहत्वम् ।

एष ह वाव संवत्सरः प्रजापतिरास ।

एतानेव तद्द्वादश मास उवाच द्वादशाहमस्मीति ।

तदाहुः किं द्वाः किं दश किमहरिति ।

स ब्रूयादादित्य एव द्वारादित्यो दशादित्योऽहरिति ।

स यदादित्य एव द्वारित्येष ह्येव स्वर्गस्य लोकस्य द्वारम् ।

अथ यदादित्यो दशेत्येष ह्येवासु दशसु दिक्षु तपति ।

अथ यदादित्योऽहरित्येष ह्येवाहः ।

तदाहुर्याजयितव्यं द्वादशाहेना३ना३इति ।

नेति ब्रूयात् ३७५