तूष्णीं स्तुतं वाचानुशंसति ।
तस्माद्यन्मनसाधिगच्छति तद्वाचा वदति ।
तस्मादोषधयो मूलतो जायन्तेऽग्रतः पच्यन्ते ।
तदाहुस्समिष्टेषु पत्नीसंयाजेषु स्तोतव्या३मसमिष्टेषू३इति ।
असमिष्टेष्वित्याहुः ।
प्रतीचीष्वेवासु तद्गर्भान्दधति ।
स्त्री बलं च ह तु भवति पापवस्यसं च ।
समिष्टेष्वेव स्तोतव्यं पापवस्यसस्य व्यावृत्त्यै ।
अथो ह न तथा स्त्री बलं भवति ।
अथो हासु तत्पराचीष्वेव गर्भान्दधति ।
प्रत्यञ्चश्च वै पराञ्चश्च मनुष्यास्सम्भवन्ति ।
तस्मात्समिष्टेष्वेव स्तोतव्यमिति ।
औदुम्बरीं समारभन्ते -ऊर्ग्वा अन्नमुदुम्बर -ऊर्ज एवान्नाद्यस्यावरुद्ध्यै ।
वाचं यच्छन्ति ।
वाग्वै ब्रह्म ।
वाचमेव तद्ब्रह्म यज्ञमात्मसु यच्छन्ति ।
इह धृतिरिह स्व धृतिर्मैरमो मैरमतिरिति ।
यच्चित्तं या धृतिर्यन्मनो या वाक्तान्येवैतदास्तसु यच्छन्ति ।
यदस्तमिते विसृजेरन्नहर्भ्रातृव्यलोकमुच्छिंष्युः ।
यदनस्तमिते विसृजेरन्रात्रिं भ्रातृव्यलोकमुच्छिंष्युः ।
अर्धास्तमित आहवनीयं परेत्य विसृजन्ते ।
उभाभ्यामेव तदहोरात्राभ्यां द्विषन्तं भ्रातृव्यमन्तर्यन्ति ।
उभाभ्यामेवाहोरात्राभ्यां द्विषन्तं भ्रातृव्यमन्तरेति य एवं वेद ।
तदु वा आहुरस्तमित एव विसृज्यम् ।
अहोरात्रे वै परिवर्तमाने संवत्सरमाप्नुतः ।
संवत्सरो यज्ञाः ।
यज्ञमेवैतदाप्त्वा विसृजन्त -उपसृजन्धरुणं मात्रे मातरं धरुणो धयन्रायस्पोषमिषमूजमस्मासु दीधरत्स्वाहे
ति ।
स यथा न्योकसं गां संयुज्य प्रार्जयेदेवमेवैतद्वाचं चं यजमानं च संयुज्य प्रार्जयन्ति ।
यथा हैनया वदति । तथैभ्योऽनपक्रमणी भवति ।
ते यं कामं कामयेरंस्तं ध्यायेयुः ।
स हैवैभ्यः कामस्समृध्यते ।
सुब्रह्मण्यया वाचं विसृजन्ते ।
ब्रह्म वै सुब्रह्मण्या ।
ब्रह्म वाक् ।
ब्रह्मणैव तद्वाचं विसृजन्ते ३०७