अक्रान्समुद्रः परमे विधर्मन्न्
इति परमो वा अश्वः पशूनां । परमस्समुद्रः । परमं नवममहस् । तस्मादेता नवमेऽहन्क्रियन्ते ।
जनयन्प्रजा भुवनस्य गोपा
इति जनद्वतीर्भवन्ति ।
जनद्वद्वै जगत्यै रूपम् ।
जागतमेतदहः ।
वृषा पवित्रे अधि सानो अव्ये बृहत्सोमो वावृधे स्वानो अद्रि र्
इति वृषण्वतीर्बृहद्वतीर्भवन्ति बृहतो रूपम् ।
बार्हतमेतदहः ।
महत्तत्सोमो महिषश्चकारे
ति महद्ध्येतदहर्यदष्टाचत्वारिंशम् ।
अपां यद्गर्भोऽवृणीत देवान् ।
अदधादिन्द्रे पवमान ओजोऽजनयत्सूर्ये ज्योतिरिन्दुः
इति जनद्वतीर्भवन्ति ।
प्रातस्सवनादेवैतन्नवममहः प्रजनयन्ति ।
मत्सि वायुमिष्टये राधसे च मत्सि मित्रावरुणा पूयमानः ।
मत्सि शर्धो मारुतं मत्सि देवान्मत्सि द्यावापृथिवी देव सोम
इति सर्वदेवत्यं भवति ।
वैश्वदेवं ह्येतदहर्जागतम् २४०