अथ पाञ्चवाजम् ।
एतेन वै पञ्चवाजाः कौत्स उभे अन्धसी व्यपपीत यच्च दैव्यं यच्च मानुषम् ।
ते एवैतेन विपिपीते ।
पञ्चवाजा वै कौत्सोऽकामयतोभे अन्धसी विपिपीय यच्च दैव्यं यच्च मानुषमिति ।
स एतत्सामापश्यत् ।
तेनास्तुत ।
ततो वै ते स उभे अन्धसी व्यपिपीत यच्च दैव्यं यच्च मानुषम् ।
ततो ह स्म वै स सुरादृतिमुपाधाय सोमार्थं धारयति ।
तदेतदन्नाद्यस्यावरुद्धिस्साम ।
उभे अन्धसी विपिपीते यच्च दैव्यं यच्च मानुषं य एवं वेद ।
यदु पञ्चवाजाः कौत्सोऽपश्यत्तस्मात्पाञ्चवाजमित्याख्यायते ।
अथ क्रौञ्चम् ।
क्रुङ्ङाङ्गिरस ईष्यमिवाहरविन्दत् ।
ईष्या इवैते यच्छन्दोमाः ।
तस्माच्छन्दोमेषु क्रियते ।
तन्मध्येस्वारं भवति ।
प्राणो वै स्वरः ।
अभिषज्या इवैते यच्छन्दोमाः ।
द्वे द्वे अहनी समस्ताः ।
तद्यन्मध्ये स्वारं भवति प्राणमेवैतच्छन्दोमेषु दधति भिषज्यन्त्येवैनानेतेन २२९