अथ स्वाशिरामर्कोऽन्नं वा अर्कोऽन्नाद्यस्यैवावरुद्ध्यै ।
स्वाशिरो वै नामाप्सरस इमा एवौषधयः ।
ता अकामयन्त बह्वी स्याम । प्रजायेमहि । वीमं लोकमाप्नुयामेति ।
ता एतत्सामापश्यन् ।
तेनास्तुवत ।
ततो वै ता बह्वीय आसन् । प्राजायन्त । वीमं लोकमाप्नुवन् ।
सोऽयं सर्वो लोक ओषधीभिस्सञ्छन्नोऽपि गिरयः ।
तदेतत्प्रजननं साम ।
बहुः प्रजया पशुभिः प्रजायते । वीमं लोकमाप्नोति य एवं वेद ।
यदु स्वाशिरोऽप्सरसोऽपश्यंस्तस्मात्स्वाशिरामर्क इत्याख्यायते ।
अभि द्युम्नं बृहद्यश
इत्यभीति भवति रथन्तरस्य रूपम् ।
राथन्तरमेतदहः ।
जिन्वन्गविष्टये धिय
इति गोमतीः पशुमतीर्भवन्ति । पशूनामेवावरुद्ध्यै ।
पशवो हि छन्दोमाः २२६