अथ पौरुहन्मनमभ्यारम्भो यज्ञस्य प्रत्यपसारः ।
अभ्येव नवममहरारभते प्रति सप्तममपधावति ।
अभ्यारम्भैर्वै देवा असुरान्यज्ञादन्तरायन् ।
पुरुहन्मा वैखानसः पशुकामस्तपोऽतप्यत ।
स एतत्सामापश्यत् ।
तेनास्तुत ।
स एतामिळामुपैत् ।
पशवो वा इळा ।
ततो वै स पशूनवारुन्द्ध ।
तदेतत्पशव्यं साम ।
अव पशून्रुन्द्धे बहुपशुर्भवति य एवं वेद ।
यदु पुरुहन्मा वैखानसोऽपश्यत्तस्मात्पौरुहन्मनमित्याख्यायते ।
देवासुरा अस्पर्धन्त ।
ते देवा अकामयन्त पूर्व एवासुरान्हन्यामेति ।
त एतत्सामापश्यन् ।
तेनास्तुवत ।
तेनासुरान्पूर्वेऽघ्नन् ।
तद् यत्पूर्वेऽघ्नंस्तद्वेव पौरुहन्मनस्य पौरुहन्मनत्वम् ।
पूर्वं एव द्विषन्तं भ्रातृव्यं हन्ति य एवं वेद २१५