तासु वसिष्ठस्य वीङ्कमतिक्रान्तिः ।
अति वा एतर्ह्यनुष्टुबनुष्टुभं क्रामति ।
सैषानुष्टुप्सती त्रयस्त्रिंशदक्षरा सम्पद्यते ।
तेनातिक्रामति ।
वसिष्ठो वै जीतो हतपुत्रोऽकामयत वीमाल्ँ लोकानश्नुवीय । वि प्रजया पशुभिरश्नुवीयेति ।
स एतत्सामापश्यत् ।
तेनास्तुत ।
तेन वीवीत्येवेमाल्ँ लोकानाश्नुत । वि प्रजया पशुभिराश्नुते ।
तदेतत्स्वर्ग्यं प्रजननं साम ।
वीमाल्ँ लोकानश्नुते । वि प्रजया पशुभिरश्नुते । य एवं वेद ।
तदु स्तोभानुतुन्नं भवति ।
अनुतुन्नाद्वै प्रजाः पशवः प्रजायन्ते ।
पशवश्छन्दोमाः ।
तेन वै रूपसमृद्धम् ।
यदु वसिष्ठोऽपश्यत्तस्माद्वसिट्ठस्य वीङ्कमित्याख्यायते ।
तदैळमच्छावाकसाम भवति ।
पशवो वा इळा ।
पशुष्वेवैतत्प्रतितिष्ठन्ति २०४