तासु सौश्रवसम् ।
कुत्सो ह वा औरव इन्द्र स्योरोरधि निर्मित आस ।
यादृश एवेन्द्र स्तादृश । यथात्मनो निर्मित स्यादेवम् ।
तं ह सङ्ग्रहीतारं चक्रे ।
तं ह जाययाभिजग्राह शच्या पौलोम्या ।
तां होवाव कथेत्यमकरिति ।
सा होवाच न वां व्यज्ञासमिति ।
स होवाच खलतिं वा एनं करिष्यामि । तथा विजानीतादिति ।
तं ह खलतिं चकार ।
स होष्णीषं परिहृत्योपनिपेदे ।
स एवैष सङ्ग्रहीतुरुष्णीषः ।
तं हाभ्येव जग्राह ।
तां होवाच कथेत्थमकरिति ।
सा होवाच न वां व्यज्ञासम् । उष्णीषेण वै मा परिहृत्योपन्यपादीति ।
स होवाचान्तरांसयोर्वा अस्य पांसूनधिवप्स्यामि । तथा विजानीतादिति ।
तस्य हान्तरांसयोः पांसूनध्युवाप ।
त एवैते सङ्ग्रहीतुरन्तरांसयोः पांसवः ।
तान्ह प्रावृत्योपनिपेदे ।
तं हाभ्येव जग्राह ।
तां होवाच कथेत्थमकरिति ।
सा होवाच न वां व्यज्ञासम् ।
प्रावृत्य वै मोपन्यपादीति १९९