अथ वाजजित् ।
अन्नं वै वाजः ।
यदा वै गौरश्वः पुरुषोऽन्नस्य सुहितो भवति । अथ स वाजी भवति ।
देवासुरा अन्नाद्ये अस्पर्धन्त ।
ते देवा अकामयन्त वृञ्जीमह्यन्नाद्यमसुराणामिति ।
त एतत्सामापश्यन् ।
तेनास्तुवत ।
ते वाजिजिगीवेत्येवान्नाद्यमसुराणामवृञ्जत ।
तदेव वाजजितो वाजजित्त्वम् ।
तदेतदन्नाद्यस्यावरुद्धिस्साम ।
अवान्नाद्यं रुन्द्धे । वृङ्क्ते द्विषतो भ्रातृव्यस्यान्नाद्यं य एवं वेद ।
तत्पञ्चाक्षरणिधनं भवति ।
पाङ्क्तो वै यज्ञः ।
अतीव वा एते यज्ञस्य मात्रां क्रामन्ति य एतदहरागच्छन्ति ।
तद्यत्पञ्चाक्षरणिधनं भवति पाङ्क्तो यज्ञो यावती यज्ञस्य मात्र तां नेदतिक्रामामेति १५१