ता अब्रुवन्रूपाणि ह नो वेत्थ ।
तानि नः प्रयच्छ । यैर्वयं रूपिणीरसाम ।
रूपी स ब्राह्मणोऽसद्योऽस्मा वेदेति ।
ताभ्यो रूपाणि प्रायच्छत् ।
यत्प्रावृषि निहतरजस्कायै प्रथमं सञ्जायमानाया अस्यै रूपं भवति । तदस्यै प्रायच्छत् ।
यद्वेव प्रावृषि निहतरजस्कस्यान्तरिक्षस्य रूपं भवति । तदमुष्यै प्रायच्छत् ।
एतानि ह वा आसां रूपाणि ।
तास्संवत्सरमुषित्वापैवाक्रामन् ।
सोऽब्रवीत्कथापाक्रमिष्टेति ।
ता अब्रुवन्नामानि ह नो वेत्थ ।
तानि नः प्रयच्छ । यैर्वयं नामिनीरसाम ।
नामी स ब्राह्मणोऽसद्योऽस्मा वेदेति ।
ताभ्यो नामानि प्रायच्छत् ।
भूस्त्वमसीतीमामब्रवीद् । भुवस्त्वमित्येतां । स्वस्त्वमित्यमूम् ।
एतानि ह वा आसां नामानि ।
तास्संवत्सरमुषित्वापैवाक्रामन् ।
सोऽब्रवीत्कथापाक्रमिष्टेति १०६