ता अब्रुवन्नैन्द्रा न्ह नो घोषान्वेत्थ ।
तान्नः प्रयच्छ । यैर्वयं घोषिणीरसाम ।
घोषी स ब्राह्मणोऽसद्योऽस्मान्वेदेति ।
ताभ्य एतानैन्द्रा न्घोषान्प्रायच्छत् ।
योऽग्नेर्घोषो यो रथस्य । तमस्यै प्रायच्छत् ।
यो वायोर्घोषो यो वयसां । तमेतस्यै प्रायच्छत् ।
यः पर्जन्यस्य घोषो यो दुन्दुभेस्तममुष्यै प्रायच्छत् ।
एते ह वा आसामैन्द्रा घोषाः ।
तास्संवत्सरमुषित्वापैवाक्रामन् ।
सोऽब्रवीत्कथापाक्रमिष्टेति ।
ता अब्रुवन्नैन्द्रा न्ह नो निक्रिळान्वेत्थ ।
तान्नः प्रयच्छ । यैर्वयं क्रीळाम ।
क्रीळात्स ब्राह्मणः प्रजया पशुभिर्योऽस्मा वेदेति ।
ताभ्य एतानैन्द्रा न्निक्रीळान्प्रायच्छदिन्द्रा इन्द्रा इन्द्रा इति ।
एते ह वा आसामैन्द्रा निक्रीळाः ।
तास्संवत्सरमुषित्वापैवाक्रामन् ।
सोऽब्रवीत्कथापाक्रमिष्टेति १०५