सोम उ ष्वाणस्सोतृभिर्
इति सिमानां रूपम् ।
अधि ष्णुभिरवीनाम्
इति गोमतीः पशुमतीर्भवन्ति पशूनामेवावरुद्ध्यै ।
पशवो ह्येतदहः ।
समुद्रं न संवरणान्यग्मन्मन्दी मदाय तोशत
इति समुद्र वतीर्भवन्ति ।
आपो ह्येतदहः ।
ता न्यूनाक्षरा भवन्ति ।
सप्ताक्षराण्येकानि पदानि भवन्ति । नवाक्षराण्येकान्य् । एकादशाक्षराण्येकानि । द्वादशाक्षराण्येकानि ।
तदेतदभिपूर्वमेव शक्वरीणां रूपमुपगच्छन्ति ।
तास्वानूपमनुतोदवत्सिमानां रूपम् ।
अनुतुन्नाद्वै प्रजाः पशवः प्रजायन्ते ।
प्र प्रजया पशुभिर्जायते य एवं वेद ।
अनूपो वै धीतोनिरकामयतोभयं ब्रह्म च क्षत्रं चावरुन्धीय । राजा सन्नृषि स्यामिति ।
स एतत्सामापश्यत् ।
तेनास्तुत ।
ततो वै स उभयं ब्रह्म च क्षत्रं चावारुन्द्ध । राजा सन्नृषिरभवत् ।
उभयमेव ब्रह्म च क्षत्रं चावरुन्द्धे । राजा सन्नृषिर्भवति य एवं वेद ।
यद्वनूपो धीतोनिरपश्यत्तस्मादानूपमित्याख्यायते ९७