तौ वै पृच्छावहा इति ।
तौ हेक्ष्वाकूनेव प्रश्नमेयतुः ।
ते हेक्ष्वाकव ऊचुर्यो वाव रथं सङ्गृह्णाति स रथस्येशे ।
त्वमेव हन्तासीति वृशमेव पराब्रुवन् ।
सोऽकामयतोदित इयां । गातुं नाथं विन्देय ।
समयं कुमारो जीवेदिति ।
स एतत्सामापश्यत् ।
तेनैनं समैरयद्
आ ते दक्षं मयोभुवम्
इति ।
प्राणा वै दक्षाः ।
प्राणानेवास्मिंस्तददधात् ।
वह्निमद्या वृणीमहे ।
पान्तमा पुरुस्पृहमा मन्द्र मा वरेण्यमा विप्रमा मनीषिणम् ।
पान्तमा पुरुस्पृहमा रयिमा सुचेतनमा सुक्रतो तनुष्वा ।
पान्तमा पुरुस्पृहमिति ।
पान्तो वै पुरुषः ।
तदेनं तत्समैरयत् ।
तदेतद्भेषजं प्रायश्चित्तिस्साम ।
भेषजं वै तत्प्रायश्चित्तिमकुरुत ।
भेषजमेवैतेन प्रायश्चित्तिं कुर्वते ।
तदु कामसनि ।
एतं वै स काममकामयत ।
सोऽस्मै कामस्समार्ध्यत ।
यत्काम एवैतेन साम्ना स्तुते । समस्मै स काम ऋध्यते ९५