तामाहुरारम्भणतस्तृचस्य कार्या ।
मुखतो वै रेतस्सिक्तं । तदितः प्रजायते ।
तद्वै रेतो यदितस्सिच्यते ।
अन्नाद्धि रेतस्सिच्यत इति ।
तदाहुरुपरिष्टादेव कार्या -इदं वै प्रजननम् । इतः प्रजाः प्रजायन्ते यतः प्रजाः प्रजायन्ते ततः प्रजायामहा इति ।
तस्मादुपरिष्टादेव कार्या ।
इन्द्रा ग्नी युवामिम
इत्यैन्द्रा ग्निं भवति ।
अभि स्तोमा अनूषते
ति बहून्स्तोमानभिवदति ।
एकस्तोमान्यन्यान्यहानि भवन्ति ।
अथैतत्त्रिष्टोमम् ।
तस्माद्
अभि स्तोमा अनूषते
ति बहून्स्तोमानभिवदति ।
पिबतं शम्भुवा सुतं
या वा सन्ति पुरुस्पृहो नियुतो दाशुषे नरा ।
इन्द्रा ग्नी ताभिरा गतं
ताभिरा गच्छतं नरोपेदं सवनं सुतम् ।
इन्द्रा ग्नी सोमपीतये
इत्येकदेवत्यान्यन्यानि स्तोत्राणि भवन्त्य् । अथैतद्द्विदेवत्यम् ।
यथोभयापदी प्रतितिष्ठेत्तादृक्तत् ।
त्रिणव स्तोमो भवति ।
त्रिणवा इमे लोकाः ।
एष्वेवैतल्लोकेषु प्रतितिष्ठन्तो यन्ति ९०