उत्तिष्ठन्नोजसा सहे
त्यैन्द्रं भवति ।
त्रिणवो वै स्तोम ओजो वीर्यम् ।
तमेवैतत्प्रत्यक्षमनुवदन्ति ।
अनु त्वा रोदसी उभे
इतीमे ह वाव रोदसी ।
एते एवैतदभिवदति ।
स्पर्धमानमददाताम्
इत्येते वा एनं तत्स्पर्धमानमन्वददाताम् ।
इन्द्र यद्दस्युहाभव
इति घ्नद्वत् ।
एतद्वै यजमानस्य स्वं स्तोत्रं यद्ब्रह्मणः ।
स्व एव तदायतने यजमानस्य सर्वं पाप्मानं घ्नन्ति ।
वाचमष्टापदीमहं नवस्रक्तिमृतावृधम् ।
इन्द्रा त्परि तन्वं ममे
इति गायत्री वै वागष्टापदी ।
तस्यै त्रिवृदेव स्तोम स्रक्तयः ।
एतद्वै दैव्यं परमं मिथुनं प्रजननं यत्त्रिवृच्च स्तोमो गायत्री च छन्दः ।
दैव्यमेव तत्परमं मिथुनं प्रजननं दधति यजमानस्य प्रजात्यै ८९