प्र सोमासो अधन्विषुः पवमानास इन्दवः ।
श्रीणाना अप्सु वृञ्जते
अभि गावो अधन्विषुरापो न प्रवता यतीः ।
पुनाना इन्द्र माशत
इत्याप आप इति भवत्यापो ह्येतदहः ।
प्र पवमान धन्वसि सोमेन्द्रा य मादनः ।
नृभिर्यतो वि नीयसे
इति सप्तर्चं भवति ।
सप्त वै प्राणाः ।
प्राणैरेवैतत्समृध्यमाना यन्ति । प्राणेषु प्रतितिष्ठन्तः ।
तदाहुर्यत्सप्तर्चं सप्तमस्याह्नो रूपमथ कस्मात्पञ्चमेऽहन्क्रियत इति ।
स ब्रूयात्सप्तपदा वै शक्वर्यस् । सप्त ग्राम्याः पशवस् । सप्त चतुरुत्तराणि छन्दांसि । सप्त मुख्याः प्राणास् । सप्तविंशतिर्दिव्यानि नक्षत्राणि । सप्तविंशमेतदहर् । एतस्यैव सर्वस्यावरुद्ध्या एतस्योपाप्त्या इति ।
उत्तरं सप्तर्चं भवति ।
अभिपूर्वमेवैतत्प्राणैस्समृध्यमाना यन्ति ।
चौत्रृचं भवति चतुष्पदा वै पशवः ।
पशव एतदहः पशूनामेवावरुद्ध्यै ।
पर्यासो भवति प्रजानां धृत्यै पशूनामुपस्थित्यै ।
त्रिणव स्तोमो भवति ।
त्रिणवा इमे लोकाः ।
एष्वेवैतल्लोकेषु प्रतितिष्ठन्तो यन्ति ८६